Belsendi ómirge bel sheshe kiris!

«Sózden – iske» degen uranmen uıymdastyrylǵan aksııada Den­saýlyq saqtaý mınıstri Ajar Ǵı­nııat, Mádenıet jáne sport vıse-mınıstri Sársen Quranbek, Dúnıe­júzilik densaýlyq saqtaý uıymynyń ókili, uıymnyń eldegi keńsesiniń basshysy Sken­der Syla da tóbe kórsetip, kóp­tiń ortasynan tabyldy. Tań­ǵy jattyǵýǵa kirispes buryn Densaýlyq saqtaý mınıstri Ajar Ǵınııat Dúnıejúzilik den­saý­lyq kúniniń mán-mańyzy týraly oı qozǵap, ataýly kúnde eń áýeli eldi salamatty ómir saltyn usta­nýǵa shaqyrý ózekti ekenin aıtty. Rasynda solaı, «Aýyryp em izdegen­­she, aýyrmaýdyń jolyn izde­gen» áldeqaıda tıimdi.

– Búgingi aksııaǵa salamatty ómir saltyn ustanýdyń den­saýlyqqa paıdasy kól-kósir ekenin túsinetin qaýym jıyldy dep bilemiz. Mundaı is-sha­ralar elimizdiń barlyq óńirinde ótip jatyr. 1950 jyldan bastap 7 sáýir – Densaýlyq kúni atalyp ótedi. Baǵalaý qory­tyndysy boıynsha byltyr ere­sek­terdiń tek 18%-y ǵana aptasyna 150 mınýttan ar­tyq shy­nyǵatyny belgili boldy. Bıyl Dúnıejúzilik densaýlyq kúni «Barshaǵa densaýlyq» ura­nymen ótip jatyr. Deni saý urpaq qalyptastyrý – eldiń basty usta­nymy. Infeksııalyq emes aýrý­lardyń aldyn alýda salamatty ómir saltyn ustanyp, durys tamaqtaný, fızıkalyq belsendilikti arttyryp, zııandy ádetterden arylý mańyzdy, – degen A.Ǵınııat qala turǵyndaryn densaýlyqqa beıjaı qaramaı, profılaktıkalyq skrınıngtik tekserýden ýaqtyly ótýge sha­qyrdy.

Izin ala Dúnıejúzilik den­saýlyq saqtaý uıymynyń ókili Skender Syla Qazaqstan Úki­metiniń qoǵamdyq densaýlyq saqtaý salasyndaǵy ınnovasııalardy qoldaýǵa erekshe mán berip otyrǵanyn atap ótti.

– «Deni saý ult» jáne «Adam­dar­dyń densaýlyǵy men ál-aýqatyn nyǵaıtý úshin aýyldyq densaýlyq saqtaýdy jańǵyrtý» ulttyq jobalaryn iske asyrý jańa Qazaqstannyń damýyna óz úlesin qosady. Dúnıejúzilik densaýlyq saqtaý uıymy ne­gizgi bastamalardyń ulttyq jos­parlarǵa ınte­grasııalanýyn joǵary baǵa­laıdy jáne teh­nıkalyq jáne ádisnamalyq qoldaý kórsetýdi jal­ǵastyrady. Prezıdent Qasym-Jomart Toqaev mindetti áleýmettik medısınalyq saqtandyrý sapasyn jaqsartýǵa, densaýlyq saqtaý salasyndaǵy mamandardyń mártebesin art­tyrýǵa jáne olardyń quqyǵyn qorǵaýǵa erekshe nazar aýdarady. Biz densaýlyqty nyǵaıtýǵa, beıbitshilikti saqtaýǵa ún qosyp, áleýmettik osal toptardyń ıgi­ligi úshin qyzmet etýdi jalǵas­tyramyz», deıdi S.Syla.

Budan soń saıabaqqa jınal­­ǵan qaýym Astana medısına­lyq ýnıversıtetiniń jattyqty­rýshysy, erkin kúres­ten sport she­beri Sergeı Glý­shen­komen bir­ge dene qyz­dyr­atyn jattyǵýǵa kiri­sip, keıin qashyq­tyqqa jú­girdi.

Álemdik zertteýlerge súıener bolsaq, fızıkalyq belsendiliktiń azdyǵynan aýrýǵa shaldyǵyp, mezgilsiz qaıtys bolǵandar kóp. Fızı­kalyq belsendiliktiń azdy­ǵynan aýyryp, ómirimen qosh­tastandar álemdegi ólim-jitimniń 6%yn quraıdy eken. Odan keıingi satyda joǵary qan qysymy (13%), temeki shegý (9%) jáne qandaǵy glıýkozanyń joǵary deń­geıi (6%) tur. Sonymen qatar artyq salmaq pen semizdik álemdegi ólim-jitimniń 5%-yn quraıdy. Osy kórsetkishter saıyp kelgende salamatty ómir saltyn ustanbaı, aýrýdyń aldyn almaǵannan órship tur. Árıne, ár adam óz densaýlyǵyna ózi ja­ýapty. Endeshe, Densaýlyq kúninde saıabaqqa jınalǵan jas­tar da kókeıge kóp nárse túıdi dep senemiz.

Aqparat úshin eske salsaq, Dúnıejúzilik densaýlyq kúnine oraı elordada A.Baıtursynuly atyndaǵy Binom school-da «Den­­saýlyq sabaǵy» ashyq sa­baǵy ótse, № 9 qalalyq em­hanada «Ashyq esik kúni» uıym­dastyryldy. Sondaı-aq Den­saýlyq saqtaý mınıstrligi, Dúnıejúzilik densaýlyq saqtaý uıymynyń ókilderi Astana medısına ýnıversıtetiniń stý­dentterimen kezdesti.