Qazirgi ýaqytta Otbasynyń sıfrlyq kartasy memlekettik qoldaý is-sharalaryn alýǵa quqyǵy bar qazaqstandyqtarǵa ótinish jazbaı-aq járdemaqylar men áleýmettik tólemderdiń 9 túrin resimdeýge múmkindik beredi. Olar – júktilikke jáne bosanýǵa baılanysty tabysynan aıyrylǵan jaǵdaıda tólenetin áleýmettik tólem, bala kútimine baılanysty tabysynan aıyrylǵan jaǵdaıda tólenetin áleýmettik tólem, jumysynan aıyrylǵan jaǵdaıda tólenetin áleýmettik tólem, asyraýshysynan aıyrylylǵanda beriletin áleýmettik tólem, múgedektigi bar balany tárbıelep otyrǵan ata-anasyna (qamqorshysyna) arnalǵan járdemaqy, múgedekterge beriletin járdemaqy, kópbalaly otbasylarǵa beriletin járdemaqy, «Altyn alqa» jáne «Kúmis alqa» alqalarymen marapattalǵan kópbalaly analarǵa beriletin járdemaqy, ataýly áleýmettik kómek.
Máselen, elorda turǵyny Altynqyz Eleý avtomatty túrde habarlama alǵannan keıin bala kútimine baılanysty tabysynan aıyrylǵan jaǵdaıda beriletin áleýmettik tólemdi resimdegen. «Árıne, mundaı tólem beriletinin biletinmin. Ol úshin bir jerge baryp aryz jazý kerek dep oıladym. Biraq maǵan habarlama keldi. Oǵan yńǵaıly bankti tańdaý arqyly jaýap berdim jáne bir aıdyń ishinde aqsha shotyma tústi. Bul óte yńǵaıly», deıdi Altynqyz.
Sondaı-aq Otbasynyń sıfrlyq kartasy arqyly zeınetaqy tólemderin alý múmkindigi týraly avtomatty habarlama iske asyrylǵan.
Memlekettik qoldaý is-sharalaryn alýǵa quqyq belgilengen kezde áleýetti alýshyǵa 1414 biryńǵaı baılanys ortalyǵynan SMS-habarlama jiberiledi. Habarlama alǵan azamat oǵan kelisimi týraly jaýap berýi kerek. О́tinishti resimdeý jáne áleýmettik járdemaqy nemese tólem taǵaıyndaý avtomatty rejimde júrgiziledi. Sodan keıin qarajat alýshynyń bank shotyna aýdarylady.
«Alaıaqtyq táýekelin boldyrmaý maqsatynda 1414 biryńǵaı baılanys ortalyǵynan kelip túsken SMS-ke jaýap berý qajet. Suraqtar týyndasa, 1414 nómiri boıynsha Call-ortalyqqa habarlasýǵa bolady. Qońyraý shalý tegin», dep habarlady Eńbek jáne halyqty áleýmettik qorǵaý mınıstrligi.
Otbasynyń sıfrlyq kartasy – ártúrli memlekettik organdardyń málimetterin jınaqtaıtyn, azamattardyń áleýmettik ál-aýqatynyń deńgeıin anyqtaýǵa jáne olarǵa proaktıvti formatta kepildendirilgen memlekettik qoldaý kórsetýge múmkindik beretin aqparattyq júıe. Búgingi tańda memlekettik organdardyń aqparattyq júıeleriniń derekteri negizinde Otbasynyń sıfrlyq kartasynda Qazaqstannyń 19,5 mln azamaty nemese 6,3 mln otbasy týraly aqparat jınaqtalǵan.
