Elshi áýe kompanııanyń bas dırektorymen kezdesýinde Úkimetiniń eki el azamattarynyń iskerlik jáne týrıstik saparlaryn jeńildetý jónindegi is-sharalary, onyń ishinde Koroldik azamattary úshin vızasyz rejimdi engizý jáne Qazaqstan áýejaılarynda «áýe erkindiginiń» besinshi dárejesin paıdalaný múmkindigi týraly sóz qozǵady.
Bander Ál-Mohanna bolsa kompanııanyń qazaqstandyq tarappen iskerlik jáne týrıstik baılanystardy nyǵaıtýǵa degen qyzyǵýshylyǵyn joǵary baǵalap, bıyl Qazaqstan men Saýd Arabııasy qalalary arasynda tikeleı turaqty áýe reısterdiń iske qosylatynyn málimdedi. Eki el arasynda «Airbus A330» jańa ushaqtary qatynaıdy.
Sondaı-aq taraptar bıylǵy qajylyq maýsymynda qazaqstandyq qajylardy Saýd Arabııasyna tasymaldaýǵa qatysty máselelerdi talqylady. Jaqynda Qazaqstan musylmandary dinı basqarmasy sheshimimen «Flynas» áýe kompanııasy elimizdiń qajylaryn tasymaldaıtyn negizgi áýe tasymaldaýshylarynyń biri bolyp belgilengen edi. Osyǵan oraı Berik Aryn el qajylaryna barynsha qolǵabys etýge, qolaıly baǵamen tıisti qyzmet kórsetýge jáne qaýipsizdikterin qamtamasyz etýge basty nazar salýdy surady. Bander Ál-Mohanna óz tarapynan bıyl qajylyq jasaýǵa nıettengen qazaqstandyq qajylarǵa barlyq qajetti jaǵdaılar jasalatynyna sendirdi.
Kezdesý qorytyndysy boıynsha taraptar Qazaqstan Koroldikke týrısterdi kóptep tartýǵa jáne eki eldiń týrıstik jáne áýe kompanııalary men vedomstvolarynyń qatysýymen tórtinshi roýd-shoý ótkizýge ýádelesti.
Atap aıtsaq, «Flynas» áýe kompanııasy 70 ishki jáne halyqaralyq baǵyttar boıynsha aptasyna 1,5 myńnan astam reıs jasaıtyn jeke saýdtyq loýkoster. Kompanııanyń áýe parkinde jańa «Airbus A320Neo» jáne «A330» ushaqtary bar.
