Batys Qazaqstan oblysyndaǵy Bókeı Ordasy, Jánibek, Kaztalovka, Jańaqala syndy aýdandardaǵy kıik sany bıyl taǵy eki esege kóbeıgen. Aqbókenmen mal óriste birge jaıylyp júr. Kıikterde bıyl taskene qaptap ketken. Ol endi jylqy men sıyrǵa juǵyp, sharýalardy áýre-sarsańǵa túsirip jatyr.
«Kıik kóbeıgeli, taskene de qaptady. Qadalǵan jerinen qan soryp, jarylǵansha túspeıdi. Mine, kıiktiń paıdasy. Bosqa ólip jatyr. Byltyr resmı sanaq boıynsha tóldegenge deıin biz jaqtaǵy kıiktiń sany 820 myń edi. Tóldegen soń olar kemi eki esege kóbeıdi. Ádette mańyna jolatpaıtyn dalanyń aqbókeni júrýden qalyp, ólip jatyr. Taskeneden biz de ábden zardap shegip, qınalyp kelemiz», deıdi Isataı Seısenǵalıev.
Onyń aıtýynsha, jaıylymdaǵy myńǵyrǵan malǵa jabysqan taskene aýylǵa da qaptaǵan. Sharýalar onsyz da kóktemnen kóterem bolyp áreń shyqqan mal qansorǵysh taskeneni kótere almaı jatqanyn aıtady. Keıbir sharýalar óriste júrýden qalǵan iri qarany qorada qamap ustaýǵa májbúr. О́ıtkeni, dalada birge jaıylyp júrgen kıiktegi taskene malǵa tez juǵady.
«Keneden tazartýdyń joly – maldy kúpkige salý. Men kúpkige toǵytatyn arnaıy oryn salyp aldym. Jylqy men sıyrdy dárilengen sýǵa túsiremiz. Birneshe myń maldy dárileý aýyr ári onyń shyǵyny da az emes. Mine, kıikter osylaı taskeneden ólip jatyr. Malǵa da zııany tıip, sharýalar qınalyp jatyr. Qazir men óristegi jylqylardy kúpkige salyp jatyrmyn. Memleket áli kúnge kıiktiń máselesin sheshe almaı keledi. Onyń zııanyn batystaǵy sharýalar tartyp otyr. Jaqsybaı aýyly, Kaztalovka aýdandarynyń sharýalary taskeneden qıyndyq kórip keledi», dedi qojalyqtyń ıesi.
