Dostyq jáne senim aıasynda ótken kelissózder barysynda memleket basshylary strategııalyq áriptestik pen odaqtastyqtyń jaı-kúıi men ony nyǵaıtý, barlyq salalardaǵy ekijaqty yntymaqtastyqty keńeıtý perspektıvasyn talqylady, sondaı-aq óńirlik jáne halyqaralyq kún tártibindegi ózekti máseleler boıynsha pikir almasty.
Memleket basshylary 2005 jylǵy 24 mamyrdaǵy Qazaqstan Respýblıkasy men Ázerbaıjan Respýblıkasy arasyndaǵy Strategııalyq áriptestik jáne odaqtastyq qatynastar týraly shartqa, sondaı-aq 2022 jylǵy 24 tamyzdaǵy Qazaqstan Respýblıkasy men Ázerbaıjan Respýblıkasy arasyndaǵy Strategııalyq qatynastardy nyǵaıtý jáne odaqtastyq ózara is-qımyldy tereńdetý týraly deklarasııaǵa beıildiligin rastaı otyryp, Qazaqstan-Ázerbaıjan qatynastarynyń oń serpinin qanaǵattanýshylyqpen atap kórsete otyryp, mynalar týraly málimdeıdi:
1. Qazaqstan Respýblıkasy men Ázerbaıjan Respýblıkasy (budan ári – Taraptar) arasyndaǵy ortaq tarıhqa, tilge, mádenıet pen dástúrge, tyǵyz saıası, ekonomıkalyq jáne mádenı-gýmanıtarlyq baılanystarǵa negizdelgen qatynastar eki memlekettiń baýyrlas halyqtarynyń túpkilikti múddelerine saı keledi.
Osyǵan baılanysty Taraptar bir-biriniń egemendigin, táýelsizdigi men aýmaqtyq tutastyǵyn nyq qoldaý negizinde strategııalyq áriptestik pen odaqtastyq qatynastardy damytýdy jáne nyǵaıtýdy jalǵastyrady.
2. Taraptar beıbitshilikti, turaqtylyq pen qaýipsizdikti nyǵaıtý máselelerinde tyǵyz ózara is-qımyl jasaıdy jáne osy maqsatta bir-biriniń beıbit bastamalaryn ilgeriletýge jan-jaqty járdemdesetin bolady. Taraptar Birikken Ulttar Uıymy jáne onyń mamandandyrylǵan mekemeleri, Islam yntymaqtastyǵy uıymy, Túrki memleketteri uıymy, Eýropadaǵy qaýipsizdik jáne yntymaqtastyq uıymy, Táýelsiz Memleketter Dostastyǵy jáne ózderi músheleri bolyp tabylatyn basqa da halyqaralyq jáne óńirlik uıymdar sheńberindegi is-qımyldardy odan ári úılestirip, bir-birine qoldaý kórsetetin bolady.
3. Taraptar Túrki memleketteri uıymynyń áleýetin, onyń halyqaralyq arenadaǵy róli men bedelin arttyrýǵa, sondaı-aq Azııadaǵy ózara is-qımyl jáne senim sharalary jónindegi keńesti tolyqqandy halyqaralyq uıymǵa aınaldyrý bastamasyn ilgeriletýge jáne osy Uıymǵa tóraǵalyq etý sheńberinde aıtylǵan Qazaqstan Respýblıkasynyń bastamalaryn iske asyrýǵa yqpal etetin bolady.
4. Taraptar bıologııalyq qaýipsizdikke baılanysty máseleler boıynsha aqparat pen tájirıbe almasatyn bolady.
5. 2022 jylǵy 24 tamyzdaǵy Qazaqstan Respýblıkasy men Ázerbaıjan Respýblıkasy arasyndaǵy Strategııalyq qatynastardy nyǵaıtý jáne odaqtastyq ózara is-qımyldy tereńdetý týraly deklarasııanyń 7-tarmaǵyn iske asyrý maqsatynda eki memleket basshysy Qazaqstan Respýblıkasy men Ázerbaıjan Respýblıkasynyń joǵary memleketaralyq keńesi týraly erejeni bekitedi.
6. Taraptar eki memleket arasyndaǵy ózara tıimdi saýda-ekonomıkalyq yntymaqtastyqty tereńdetýdiń mańyzdylyǵyn aıta otyryp, ózara saýdanyń údemeli ósýin qanaǵattanýshylyqpen atap ótedi.
Saýda-ekonomıkalyq yntymaqtastyq jónindegi Qazaqstan-Ázerbaıjan úkimetaralyq komıssııasynyń, Iskerlik keńestiń otyrystaryn ótkizý, saýda mıssııalarymen almasý praktıkasynyń tıimdiligimen kelise otyryp, Taraptardyń úkimetterine saýda-ekonomıkalyq baılanystardy nyǵaıtý jáne ekonomıkanyń túrli sektorlarynda birlesken ınvestısııalyq jobalardy iske asyrýǵa qolaıly jaǵdaılar jasaý úshin jańa múmkindikterdi zertteýdi tapsyrady.
Taraptar eki memlekettiń ekonomıkalyq áleýetin ashý maqsatynda Qazaqstan Respýblıkasy men Ázerbaıjan Respýblıkasy arasyndaǵy yntymaqtastyqty damytýdyń 2022–2026 jyldarǵa arnalǵan keshendi baǵdarlamasyn iske asyrýǵa odan ári járdemdesetin bolady.
7. Ázerbaıjan tarapy Ázerbaıjan Respýblıkasynyń bosatylǵan aýmaqtaryn rekonstrýksııalaý jáne qalpyna keltirý jónindegi maqsatty jumys sheńberinde Qazaqstan tarapy tanytqan múddelilikti quptaıdy jáne qazaqstandyq áriptester men ınvestorlardyń ınfraqurylymdyq jobalardy iske asyrýǵa qatysýyna járdem kórsetýge daıyn ekendigin bildiredi.
8. Taraptar Kaspıı teńizin taıazdaný saldarynyń serpinin jumsartý turǵysynan qorǵaýǵa, sondaı-aq bıoártúrlilikti saqtaýǵa baǵyttalǵan birlesken kúsh-jigerdi iske asyrý qajettigin rastaıdy.
9. Taraptar, sondaı-aq óńir elderiniń kólik-tranzıt salasyndaǵy máselelerdi tıimdi sheshý boıynsha odan arǵy ózara is-qımyly ortaq múddelerge saı jáne ulttyq kólik strategııalary basymdyqtarynyń qatarynda ekenin rastaıdy. Shyǵys-Batys Transkaspıı orta dálizi (budan ári – «Orta dáliz») munyń mańyzdy baǵyty bolyp tabylady.
Osyǵan oraı Taraptar 2022 jylǵy 25 qarashada Aqtaýda ótken Transkaspıı ózara baılanysy jónindegi mınıstrlik kezdesýinde 2022–2027 jyldarǵa arnalǵan «Osal tustardy» úılesimdi joıý jáne «Orta dálizdi» damytý jónindegi jol kartasynyń qabyldanýyn joǵary baǵalaıdy. Osy qujatqa sáıkes is-sharalardyń ýaqtyly jáne sapaly oryndalýyn qamtamasyz etý qajet dep sanaıdy.
10. Taraptar «Sıfrlyq Jibek joly» (Digital Silk Way) jobasyn iske asyrýdy qoldaıdy jáne Qazaqstan Respýblıkasy men Ázerbaıjan Respýblıkasyn Kaspıı teńiziniń túbimen jalǵaıtyn talshyqty-optıkalyq baılanys jelisin birlesip salý jónindegi jumystardy tezirek aıaqtaýǵa járdemdesetin bolady.
11. Taraptar sıfrlyq damý salasyndaǵy yntymaqtastyqty keńeıtýdiń, onyń ishinde elektrondyq qujat aınalymy júıesin jáne elektrondyq qoltańbalardy paıdalanýdyń mańyzdylyǵyn atap ótedi.
12. Taraptar otyn-energetıka salasyndaǵy, onyń ishinde energııa resýrstaryn tasymaldaý salasyndaǵy yntymaqtastyqty nyǵaıtýdyń mańyzdylyǵyn atap kórsetedi. Baký – Tbılısı – Djeıhan qubyry arqyly qazaqstandyq munaıdy jetkizýdiń bastalýyna qanaǵattanýshylyqtaryn bildiredi jáne Ázerbaıjan Respýblıkasynyń aýmaǵy arqyly qazaqstandyq munaıdy jetkizý kólemin ulǵaıtý jónindegi sharttardy kelisý boıynsha odan ári jumys júrgizý qajettiligimen kelisedi.
13. Taraptar mádenıet jáne óner, bilim, ǵylym, týrızm jáne sport salalaryndaǵy baılanystardy dáıekti túrde tereńdetýge, qoǵamdyq, jastar jáne bilim berý uıymdary, ınnovasııalyq ortalyqtar, buqaralyq aqparat quraldary arasyndaǵy baılanystarǵa járdemdesý jóninde ýaǵdalasty.
Taraptar eki halyqtyń tól mádenıetin dáripteý maqsatynda shyǵarmashylyq ujymdarmen almasý praktıkasyn oń baǵalaı otyryp, 2023 jyly Ázerbaıjanda Qazaqstan mádenıetiniń kúnderin, sondaı-aq Qazaqstanda Ázerbaıjan mádenıetiniń onkúndigin ótkizýge daıyn ekendigin bildiredi.
Taraptar ótkizilgen kelissózder men sapar barysynda qol qoıylǵan ekijaqty qujattar Qazaqstan Respýblıkasy men Ázerbaıjan Respýblıkasy arasyndaǵy dostyq jáne odaqtastyq qatynastardy odan ári nyǵaıtýǵa yqpal etetinin atap ótti.
Ázerbaıjan Respýblıkasynyń Prezıdenti Ilham Álıev Qazaqstan Respýblıkasynyń Prezıdenti Qasym-Jomart Toqaevqa jáne Qazaqstan halqyna qonaqjaılylyq kórsetkeni úshin rızashylyǵyn bildirip, jan-jaqty yntymaqtastyqty odan ári damytý maqsatynda Qazaqstan basshysyn Ázerbaıjan Respýblıkasyna ózine yńǵaıly ýaqytta saparmen kelýge shaqyrdy.
Qazaqstan Respýblıkasynyń Prezıdenti Qasym-Jomart Toqaev shaqyrýdy rızashylyqpen qabyldady. Sapar merzimi dıplomatııalyq arnalar arqyly kelisiletin bolady.
Osy Birlesken málimdemege Astana qalasynda 2023 jylǵy 10 sáýirde qazaq jáne ázerbaıjan tilderinde qol qoıyldy.
