Jarystyń alǵashqy kúni bes salmaq dárejesi boıynsha túrli-tústi júldeler sarapqa salyndy. Bizdiń balýandar arasynda eń úzdik kórsetkishke Nursultan Tursynov qol jetkizdi. 87 kg salmaqta saıysqa túsken Semeı óńiriniń týmasy shırek fınalda álem chempıonatynyń eki dúrkin júldegeri, Azııa chempıony, Islam yntymaqtastyǵy oıyndarynyń jeńimpazy, ózbekstandyq Jalǵasbaı Berdimuratovty aıqyn basymdyqpen jeńse, jartylaı fınalda qurlyq birinshiliginiń úsh dúrkin kúmis júldegeri, qyrǵyzstandyq Atabek Ázızbekovtiń tas-talqanyn shyǵardy. Biraq sheshýshi tusta Tursynovtyń Naser Gasem Álızadege áli jetpedi. Azııanyń úsh dúrkin chempıony degen ataǵy bar Iran sportshysy qandasymyzdy esh qınalmaı jeńdi. Bul – Nursultannyń atalǵan jarystaǵy tórtinshi júldesi. Buǵan deıin ol bir altyn (2014 jyly), bir kúmis (2015 jyly) jáne bir qola (2022 jyly) medal ıelengen edi.
Bastapqy beldesýleriniń birinde О́zbekstannyń ataqty balýany, álem chempıonatynyń kúmis júldegeri Aram Vardanıannyń aıaǵyn kókten keltirgende, 77 kg salmaqtaǵy Demeý Jardyraev Astanada alysqa shabatyn shyǵar dep oıladyq. Alaıda kelesi kezdesýinde ol ırandyq Ámın Iаvar Kavııanınajadqa ese jiberip, bas júlde úshin talasý múmkindiginen aıyryldy. Úshinshi oryn úshin tartysta ardager balýanymyz qytaılyq Rýı Lıýge jol berip, jergilikti jankúıerlerdi jerge qaratty.
Byltyrǵy Azııa chempıonatynda kúmis medaldi moınyna ilgen asa jeńil salmaqtaǵy Amanǵalı Bekbolatov bul joly úzdik úshtikti túıindedi. 63 kg salmaqta kúsh synasqan Muhametálı Mamyrbek te dál sol mejeden kórindi. Buryndary jastar arasyndaǵy túrli jarysta jasyndaı jarqyldaǵan daryndy balýannyń bul – eresekter saıysyndaǵy alǵashqy tabysy. Alyptarmen aıqasqan Álimhan Syzdyqov ta qola júldeni qanaǵat tutty.
Sóıtip, jarystyń alǵashqy kúnin elimizdiń grek-rım kúresi sheberleri 1 kúmis jáne 3 qola medalmen qorytyndylady. Bas júldeniń tórteýin Irannyń pehlevandary jeńip aldy. Olar – Poııa Sýlat Dad Marz (55 kg), Ima Hosseın Mohamadı (63 kg), Naser Gasem Álızade (87 kg) jáne Ámın Myrzazade (130 kg). Taǵy bir altyn medal qyrǵyzdyń bas balýany Aqjol Mahmudovtyń (77 kg) moınynda jarqyrady.
