Mınıstrdiń aıtýynsha, bıylǵy jylý berý kezeńinde halyq pen kommýnaldy-turmystyq sektordyń qatty otynǵa degen josparly qajettiligi shamamen – 9 mln tonnany quraıdy. Bul rette IIDM atalǵan ýaqytqa daıyndyqty kúsheıtý úshin kómirmenqamtamasyz etý jónindegi is-sharalar josparyn (onyń iske asyrylýy merzimimen birge) ázirlep, jergilikti atqarýshy organdarǵa joldaǵanyn aıta ketý kerek.
«Aldaǵy jylytý maýsymynda kommýnaldy-turmystyq kómirdiń tapshylyǵyn boldyrmaý úshin osy otyn túrin óndiretin kásiporyndardy qospaǵanda, avtokólikpen jáne temirjol kóligimen ony áketýge shekteıtin aldyn alý sharalary qabyldanyp jatqanyn aıta keteıik. Jylý berý mezgiliniń eń qyzǵan kezeńinde áleýmettik kómirdi satý núktelerinen jymqyrý faktileri baıqaldy. Ákimdikterdiń tarapynan tıisti baqylaýdyń júrgizilmeýine baılanysty birqatar óńirlik operator áleýmettik kómirdi basqa maqsatta, ıaǵnı bıznes sýbektilerine sata bastaǵan», dedi vedomstvo basshysy.
JAO-dyń jedel derekteri boıynsha, jylýmen jabdyqtaý jelileriniń jalpy uzyndyǵy shamamen – 14 myń shaqyrym. Osy rette jylý ınfraqurylymynyń tozýy Pavlodar, Qaraǵandy, Shyǵys Qazaqstan, Soltústik Qazaqstan jáne Abaı oblystarynda saqtalyp otyr.
Mınıstrliktiń kommýnaldy menshigindegi jylý jelilerin jańǵyrtýǵa kelsek, bul maqsatta qarjylandyrýdyń úsh tetigi iske asyrylyp jatqanyn atap ótken jón. Máselen, nysanaly transfertter arqyly, bıýdjettik kredıt bólý jáne shyǵyndardy 50%-ǵa deıin sýbsıdııalaý jolymen.
«2029 jylǵa qaraı jylýmen jabdyqtaý jelileriniń tozýyn 43%-ǵa deıin tómendetý mindeti qoıylyp otyr. Jergilikti atqarýshy organdar jylýmen jabdyqtaý jobalary boıynsha tıisti ótinimder men qujattardy usyný jónindegi jumysty jandandyrýǵa tıis. Qazir 2024 jylǵa arnalǵan respýblıkalyq bıýdjetti naqtylaý barysynda tek 43 jylýmen jabdyqtaý jobasyna baılanysty ótinimder qarastyrylǵan», dedi Marat Qarabaev.
