Premer-mınıstr ótken qys jylý energetıkasyndaǵy kóptegen máseleniń betin ashyp bergenin aıtty. Atap aıtqanda, Ekibastuz, Rýdnyı jáne Rıdder qalalarynda jaǵdaı óte kúrdeli boldy. Ondaǵy máselelerdi kúni-túni baqylaýǵa alyp, shuǵyl túrde sheshýge týra keldi.
«Barlyq ákimdikter budan qorytyndy shyǵaryp, mundaı jaǵdaıǵa endi qaıtyp jol bermeý úshin sapaly jumys isteýi kerek», dedi Álıhan Smaıylov.
Jalpy, Álıhan Smaıylovtyń aıtýynsha, buǵan deıin jabdyqtardyń tehnıkalyq jaı-kúıine ýaqytyly, keshendi jáne obektıvti baǵalaý júrgizilgen joq. Odan bólek jylý elektr ortalyqtarynyń basshylyǵy men ıeleriniń jaýapkershiligi tómen bolǵan.
«Ýákiletti memlekettik organdardyń nusqaýlyqtary tek qana usynys deńgeıinde boldy, menshik ıelerin olardy tolyqtaı oryndaýǵa mindettemeıdi. Sondyqtan qordalanyp qalǵan mundaı problemalar óte kóp. Olardyń basym bóligi jylý jelileriniń tozýyna qatysty bolyp otyr», dedi Úkimet basshysy.
Osyǵan baılanysty bıyl Úkimet energııalyq baqylaý qyzmetin zańnamalyq turǵydan kúsheıtip, olarǵa jospardan tys tekserýler júrgizý quqyǵyn beredi. Energııa obektilerin tıisti deńgeıde kútip ustamaı, tirshilikke qajetti júıelerdiń qyzmetine qaýip tóngen jaǵdaıda memleketke olardy menshikten alyp qoıý quqyǵy beriletin bolady.
«Úkimet pen ákimdikter jáne menshik ıeleri tıisti energetıkalyq ınfraqurylymdy jóndeý jáne rekonstrýksııalaý jobalaryn qarjylandyrýdy basym tártippen qamtamasyz etedi. О́ńirlerden kelip túsken ótinimder negizinde jelilerdi aýystyrý boıynsha quny 69 mıllıard teńgeni quraıtyn 47 jobadan turatyn pýl jasaqtaldy. Bul jumysty sapaly jáne ýaqytyly júrgizýdiń mańyzy óte zor», dedi Álıhan Smaıylov.
Sondaı-aq 2 myń shaqyrym jylý jelileri jeke menshikte. Olardyń tozý deńgeıi shamamen 77 paıyz bolyp otyr. Osyǵan baılanysty osy jelilerdiń jaǵdaıyna jáne jóndeý jumystarynyń mindetti túrde júrgizilýine baqylaýdy kúsheıtý kerek.
«Energııa obektileri ıeleriniń jaýapkershiligin arttyryp, ony qyzmet kórsetý kelisim-sharttarynda qarastyrý kerek. Shart talaptaryn oryndaý usynym túrinde emes, mindetti bolýǵa tıis», dedi Premer-mınıstr.
Sonymen qatar, Úkimet basshysy jeke menshiktegi jylý jelilerin bıýdjettik kredıtteý arqyly rekonstrýksııalaý máselesin pysyqtaý kerektigin aıtty. Qarjyny qaıtarý «Tarıfti ınvestısııaǵa aıyrbastaý» sheńberinde júrgiziledi. Úkimet basshysy barlyq turǵyn úı-kommýnaldyq sharýashylyq, turǵyn úı jáne áleýmettik sala obektisiniń aldaǵy 2023-2024 jylytý maýsymyna daıyndyǵy boıynsha is-sharalar josparyn bekitip, ony tez arada iske asyrýǵa kirisýi qajettigin aıtty.
Álıhan Smaıylov 1 maýsymǵa deıin qoldanystaǵy jylý jelileriniń jaǵdaıyna tehnıkalyq tekserý jumystaryn aıaqtaý jáne osy jumystardyń qorytyndysy boıynsha apatty jaǵdaıdaǵy jeke menshiktegi jylý jelilerin kommýnaldyq menshikke berýdiń qajettiligin anyqtaý kerek ekenin qosa aıtty.
«Týyndaǵan barlyq máseleni jylytý maýsymyna deıin sozbaı, jedel sheshý qajet. Usaq-túıek demeı, qaýip-qaterlerdiń barlyǵyn muqııat esepteý kerek», dep oıyn aıaqtady Premer-mınıstr.
