«Qazaqstan musylmandary dinı basqarmasy meıirim men shapaǵat, birlik pen ıgilik aıy bolǵan qasıetti Ramazan aıy kezinde kıeli ál-Qudystaǵy Islam dinindegi qasıetti úshinshi meken sanalatyn ál-Aqsa meshitinde bolǵan qaqtyǵysqa alańdaýshylyq bildiredi jáne kúrdeli máseleniń oń sheshimin tabýyn tileıdi», delingen QMDB habarlamasynda.
QMDB qasıetti Ramazan aıynda Allanyń meıiriminen úmit etip, meshitte qulshylyq jasap jatqan musylmandardy kúshpen qýdalap, olardyń ómiri men densaýlyǵyna zııan tıgizip jatqan taraptyń is-áreketin qatań aıyptady.
«Alla Taǵala qasıetti Quranda: «Qulyn (Muhammedti) bir túnde Haram meshitinen aınalasyna О́zimiz qut-bereke darytqan Aqsa meshitine keıbir mańyzdy belgilerimiz ben dálelderimizdi kórsetý úshin alyp barǵan Alla – minsiz. Ol – Sámıǵ (bárin estýshi), Basır (bárin de kórýshi)» («Isra» súresi, 1-aıat) dep baıandaıdy. Bul aıat ál-Aqsa meshitiniń musylman álemi úshin qanshalyqty qasıetti ári ardaqty ekenin aıǵaqtaıdy», delingen QMDB taratqan habarlamada.
Osy rette, dinı basqarma elimizdegi barsha musylmandy qasıetti aıda qasıetti mekenniń tynyshtyǵy men sol jerdegi musylman baýyrlarymyzdyń beıbit ómiri úshin duǵa jasaýǵa shaqyrdy.
«Alla Taǵala qasıetti ál-Aqsanyń beıbitshilik pen amandyqta bolýyn násip etsin! Rabbymyz jer betin túrli búlik pen qantógisten saqtaǵaı! Ámın!», delingen málimdemede.
