Ol sońǵy birneshe jylda otandyq astyq naryǵy shekaralas elderden bıdaıdyń kontrabandalyq ımporty saldarynan shyǵynǵa ushyraǵanyn habarlady. Salalyq qaýymdastyqtardyń málimetteri boıynsha, «sur» ımport kólemi jylyna 1,5-2 mln tonnaǵa jetedi, al memleketke keltirilgen jalpy shyǵyn jyl saıyn 500 mln dollar mólsherinde baǵalanady.
Bul rette ishki naryqta baǵanyń tómendeýi baıqalady. Máselen, 2022 jyldyń shilde aıynyń basynan bastap bıdaıdyń quny tonnasyna 170-185 myń teńgeden 80-85 myń teńgege deıin tómendegen.
Pavlodar oblysy, sondaı-aq Reseımen shekaralas Aqtóbe jáne Batys Qazaqstan oblystary zańsyz astyqty qabyldaý jáne tranzıt boıynsha antılıderler bolyp sanalady. Ákelingen bıdaı QQS tólemeı sharýa qojalyqtaryna jáne jasyryn keri eksport túrinde resimdelip, tranzıttik tarıf tólemesten Aýǵanstan men Ortalyq Azııa elderine jiberiledi.
Osy tusta Erbol Tasjúrekov kontrabandanyń birneshe ashyq faktilerin mysalǵa keltirdi.
«Qarjy monıtorıngi agenttiginiń Pavlodar oblysy boıynsha departamenti óńirdegi JShS-niń biri 2021-2022 jyldar aralyǵynda О́zbekstan, Aýǵanstan jáne Tájikstanǵa 1 mlrd teńgeden astam somaǵa 8,3 myń tonna kóleminde reseılik kontrabandalyq astyqty eksporttaǵanyn anyqtady. Bul rette jeńildikti eksporttyq tarıfti alý úshin qazaqstandyq kompanııa otandyq sharýa qojalyqtarynyń jalǵan shot-faktýralaryn paıdalandy, bul rette tranzıttik tarıften jaltardy jáne «QTJ - Júk tasymaly» JShS-ne 150 mln teńgege jýyq somada zalal keltirdi», dedi vıse-mınıstr.
Spıkerdiń aıtýynsha, «Sur ımporttyń» túsimin azaıtý úshin bıdaı ımportyn, eń aldymen QQS tólemeı, avtomobıl kóligimen ákelýdi shekteý sharalaryn qabyldaý qajet boldy, bul otandyq bıdaıdyń qunyn tómendetedi jáne oǵan suranysty azaıtady.
Atalǵan sharalar astyq naryǵyndaǵy jaǵdaıdy turaqtandyrýǵa múmkindik beredi. Bul rette, fermerlerdi tuqym materıalymen qamtamasyz etý úshin tuqymdardy avtokólikpen jetkizýge ruqsat etiledi. Bul jaǵdaıda partııalar tuqym sapasy týraly kýálikpen birge júrýi kerek. Sondaı-aq, barlyq tıisti salyqtar men alymdardy tóleı otyryp, astyqty temirjol kóligimen jetkizýge eshqandaı shekteýler belgilengen joq.
Aıta ketsek, engizilgen tyıym ýaqytsha sıpatqa ıe jáne ony iske asyrý qorytyndysy boıynsha tıisti sharalar qabyldanatyn bolady.
