«Egemen Qazaqstan»-nyń ótken sanynda biz jarystyń alǵashqy kúniniń qorytyndysy jaıynda egjeı-tegjeıli baıandaǵanbyz. Kelesi kúni taǵy bes salmaq dárejesiniń júldeleri sarapqa salyndy. Bozkilemge shyqqan balýandarymyzdyń arasynan 72 kg salmaqtaǵy Ibragım Magomadovtyń ǵana jeńis tuǵyrynyń eń bıik satysyna kóterilýge kúsh-jigeri jetti. Osyǵan deıin 32 jastaǵy saqa sportshy 2020 jyly Nıý-Delıde uıymdastyrylǵan Azııa chempıonatynda kúmis medal ıelengen edi. Basqa pálendeı tabysy joq. Arada úsh jyl ótken soń Ibragım sol kúmisin altynǵa almastyrdy. Astanadaǵy dodada úsh kezdesý ótkizgen ol barlyǵynda jeńiske jetti. Fınalda Irannyń myqty sportshysy Sadjad Álı Imentalabfýmanıden basym tústi. Sóıtip, Magomadov óziniń sporttyq mansabyndaǵy eń iri tabysyna qol jetkizdi.
82 kg salmaq dárejesinde kúsh synasqan Dıas Qalenov ózbekstandyq Muhamedqadyr Rasýlov pen japonııalyq Iýıa Maetany jolynan yǵystyrdy. Osy kezdesýlerde ol óte saýatty taktıka qura bildi. Sonyń nátıjesinde jeńis toıyn toılady. Biraq aqtyq synda qandasymyz Qyrǵyzstannyń ókili Aqylbek Talantbekovten aılasyn asyra almady. Negizi olar teń dárejede aıqasqan edi. Alaıda Dıasqa qaraǵanda bir upaı artyq jıǵan Aqylbektiń asyǵy alshysynan tústi.
67 kg salmaqtaǵy Almat Kebisbaevqa Astanada aıryqsha senim artylǵan edi. Qazaqstan quramasynyń kapıtany ár básekede baryn saldy. Taıpeılik Hon Iý Chen men úndistandyq Ashý Ashýdy jolynan yǵystyryp, jartylaı fınalda Abror Atabaevpen jolyqty. 35 jastaǵy ardager balýanymyz 21 jastaǵy ózbektiń jas jolbarysyn jeńe almady. Odan keıin tájikstandyq Fırýz Mırzoradjabovty utqan Kebisbaev qola medaldi moınyna ildi. Árıne, bul kórsetkishke qazaq balýanynyń da, basqalardyń da kóńili tolmaǵany anyq. Biraq Almatqa ókpe aıtqan eshkim bolmady. Osylaısha, ardager sportshymyz atalǵan jarystaǵy altynshy júldesine qol jetkizdi. Buǵan deıin Kebisbaev sary qurlyqtyń basty dodasynda eki altyn jáne úsh kúmis medal enshilegen edi.
97 kg salmaq dárejesinde kúsh synasqan Oljas Syrlybaı da dál sol mejeden kórindi. Dúısenbide tek 60 kg salmaqta synǵa túsken Ernar Fıdahmetov qana júldesiz qaldy. Nátıjesinde, 1 altyn, 2 kúmis jáne 5 qolany ıelengen Qazaqstannyń grek-rım kúresi sheberleri jalpykomandalyq esepte úshinshi orynǵa taban tiredi.
Astanada ótken Azııa chempıonatynda Iran quramasy aldyna jan salmady. Olar 5 altyn, 2 kúmis jáne 1 qolany oljalady. Bul nátıje eshkimdi tańdandyrǵan joq. Sebebi búgingi tańda Parsy eliniń pehlevandarymen sary qurlyqtaǵy eshbir komanda teńese almaıdy. Alaqandaı ǵana jeri, jeti mıllıonǵa jeter-jetpes halqy bar Qyrǵyzstannyń grek-rım kúresi sheberleri bul joly da keremet óner kórsetti. Buǵan deıin de sol eldiń Aqjol Mahmudov pen Jolaman Sharshenbekov syndy serke uldary ózderiniń teńdessiz ónerlerimen tórtkúl dúnıe jankúıerlerin tamsandyryp júrgen edi. Endi olardyń qataryna 82 kg salmaqtaǵy Aqylbek Talantbekov qosyldy. Bir keremeti, olardyń barlyǵy da – 23 jastaǵy órimdeı jastar. Sol úsh qurdas Astanada qarsy kelgenderdi qoǵadaı japyryp, altyn medaldi Alataýdyń arǵy betine alyp ketti. Odan bólek, aıyr qalpaqty aǵaıyndarymyz taǵy 1 kúmis pen 4 qolany oljalady. Odan keıingi satylarǵa О́zbekstan (1 altyn+1 kúmis+1 qola), Japonııa (0+1+4), Úndistan (0+1+3), Qytaı (0+1+2) jáne Ońtústik Koreıa (0+1+0) quramalary jaıǵasty.
Azııa chempıonatynyń jeńimpazdary men júldegerleri
55 kg: 1. Poıa Sýlat Dad Marz (Iran), 2. Rýpın Rýpın (Úndistan), 3. Ihtıer Botırov (О́zbekstan) men Amanǵalı Bekbolatov (Qazaqstan).
60 kg: 1. Jolaman Sharshenbekov (Kyrgyzstan), 2. Hanje Chýng (Ońtústik Koreıa), 3. Maıto Kaýana (Japonııa) men Lıgýo Chao (Qytaı).
63 kg: 1. Iman Hoseın Hýn Mohammadı (Iran), 2. Shermuhammad Sharıbjanov (О́zbekstan), 3. Muhamedalı Mamyrbek (Qazaqstan) pen Nıradj Nıradj (Úndistan).
67 kg: 1. Abror Atabaev (О́zbekstan), 2. Ketaro Sogabe (Japonııa), 3. Almat Kebisbaev (Qazaqstan) pen Razzak Beıshekeev (Qyrǵyzstan).
72 kg: 1. Ibragım Magomadov (Qazaqstan), 2. Sadjad Álı Imentalabfýmanı (Iran), 3. Vıkas Vıkas (Úndistan) pen Ádilhan Nurlanbekov (Qyrǵyzstan).
77 kg: 1. Aqjol Mahmudov (Qyrǵyzstan), 2. Ámın Iаvar Kavııanınedjad (Iran), 3. Rıý Lıý (Qytaı) men Kodaı Sakýraba (Japonııa).
82 kg: 1. Aqylbek Talantbekov (Qyrǵyzstan), 2. Dıas Qalen (Qazaqstan), 3. Iýıa Maeta (Japonııa) men Álıreza Azızhýn Mohmadıpıanı (Iran).
87 kg: 1. Naser Gasem Álızade (Iran), 2. Nursultan Tursynov (Qazaqstan), 3. Kýmar Sýnıl (Úndistan) men Jalǵasbek Berdimuratov (О́zbekstan).
97 kg: 1. Mehdı Balıhamzede (Iran), 2. Ýzýr Jýzýpbekov (Qyrǵyzstan), 3. Oljas Syrlybaı (Qazaqstan) men Iýta Nara (Japonııa).
130 kg: 1. Ámın Mırzazade (Iran), 2. Lınje Meng (Qytaı), 3. Álimhan Syzdyqov (Qazaqstan) pen Roman Kım (Qyrǵyzstan).
