Búginde ýnıversıtette 24 myńnan astam stýdent bilim alyp jatyr. Onyń 12 myńy jataqhanaǵa muqtaj. Sondyqtan stýdentter úıi ýnıversıtet tarıhyndaǵy eń aýqymdy jobalardyń birine aınalyp otyr. Qazirgi kezde stýdentter qalashyǵynda 3 gektar aýmaqta 12 myń oryndyq jataqhana qurylysyna daıyndyq júrip jatyr. «Jóndeý kezinde ǵımarattardyń qasbeti jańartylyp, barlyq bólmeniń qabyrǵalary qaıta sylanyp, árlendi. Esik-tereze, eden tósenishteri men jıhazdar satyp alyndy. Sonymen qatar elektr júıesi jańartyldy. Jataqhanalardaǵy ár seksııaǵa zamanaýı dýsh kabınalary qoıylyp, santehnıkalyq jabdyqtar aýystyryldy», dedi ýnıversıtettiń basshysy Janseıit Túımebaev.
Budan keıin meımandar ýnıversıtettiń Jaǵdaıattyq basqarý ortalyǵynyń qyzmetimen tanysty. Onda qaýipsizdik jáne baqylaý júıesi, ýnıversıtettiń aqparattyq baǵdarlamalary men baılanys ortalyǵy ornalasqan.
Oqý ordasynyń Prosestik ınnovasııalar ortalyǵy, Injınırıng jáne joǵary tehnologııalar klasteri men Jerdi qashyqtan zondtaý ortalyqtarynyń jumystary da búginde zamanaýı ǵylymdy ıgerýmen ushtasatyn ortalyqtar retinde damyp keledi. Osy oraıda ǵalymdardyń ǵylymı kórmesine qatysqan meımandarǵa nanomaterıaldar negizindegi datchıkter, energııany únemdeıtin shamdar, qan tamyrlary patologııasynyń aldyn alý jáne emdeý, týrıstik sıfrlyq kontentti jańǵyrtýǵa arnalǵan mobıldi qosymshalar, panoramalyq 3D týrlar, ınteraktıvti kartalar jáne QR kodtar, nanomaterıaldar negizindegi sýperkondensatorlar, depressııanyń psıhofızıologııalyq markerleri jáne basqa da ınnovasııalyq jobalar tanystyryldy.
Dárilik ósimdikterdi ǵylymı-zertteý ortalyǵynyń dırektory Janar Jeńis mekemeniń negizgi maqsaty elimizde ósetin dárilik ósimdikterdi zertteý ekenin aıtyp, atqarylyp jatqan jumystar jaıly baıandady. Ǵalymnyń aıtýynsha, búginde ortalyq sońǵy úlgidegi qurylǵylarmen jabdyqtalǵan. Qazirgi tańda óndiriste tumaý men baýyr aýrýlarynyń aldyn alatyn, ımmýnıtetti kóteretin, koronavırýs ınfeksııasyna qarsy bıologııalyq belsendi qospalar daıyndalady. Qant dıabetin tómendetetin, qan qysymyn retteıtin, asqazan-ishek júıesiniń jumysyn jaqsartatyn, ımmýnıtetti kóteretin fıtoshaılar óndiriledi.
Ǵylymdy óndirispen ushtastyryp otyrǵan ǵalymdar jumysymen tanysqan Altaı Kólginov ujymǵa sáttilik tilep, óndiristi damytýdyń mańyzyna toqtaldy.
