Memleket basshysy ǵylymnyń damýyna keri áser etetin faktorlarǵa toqtaldy.
«Qazaqstan basqa postkeńestik memleketter sekildi ǵylym damýynyń «mobılızasııalyq model» paradıgmasynan shyǵa almaı qaldy. Josparlaý men basqarýdyń shekten tys ortalyqtanǵan júıesi, memlekettik qarjylandyrýǵa tym táýeldi bolý, ǴZTKJ-ǵa bıznes tarapynan suranystyń az bolýy, kadr tapshylyǵy, ásirese jas mamandardyń ǵylymnan ketýi – osy modelge tán problemalar», dedi Prezıdent.
Sondaı-aq Qasym-Jomart Toqaev ǵylym salasyndaǵy ózekti máselelerdi de atap ótti. Sonyń ishinde ǵylymǵa bólinetin qarjynyń ulǵaıǵanyn, biraq, jumsalýynda teńsizdikter bar ekenin aıtty.
«Qazirgi ahýaldy sıpattaý úshin myna máselelerge toqtalyp ótý qajet. Sońǵy bes jylda ǵylymǵa bólinetin qarjy 60 paıyzǵa artty. Al ishki jalpy ónimdegi ǵylymnyń úlesi, kerisinshe, 0,13 paıyzǵa tómendedi. Bul qarajattyń basym bóligi, naqtyraq aıtsaq, 70 paıyzy bıýdjetten bólinedi. Sondaı-aq ǵylymnyń túrli salasyn qarjylandyrý isinde óte úlken teńsizdik bar. Qarajattyń 82 paıyzy irgeli jáne qoldanbaly ǵylymǵa jumsalady. Qalǵan 18 paıyzy ǵana tájirıbelik-konstrýktorlyq zertteýlerge arnalǵan.
Elimizde ǵylymı zertteýlerdi iske jaratyp, qoldanysqa engizetin óndiris óte az. Kásiporyndardyń 65 paıyzy shıkizat, metallýrgııa salasynda jumys isteıdi. Bul – úshinshi tehnologııalyq deńgeı degen sóz», dedi Qasym-Jomart Toqaev.
