Sodan beri baıqaýdyń uıymdastyrýshylary horeografııalyq oqý oryndary arasynda keń tájirıbe almasýdy júzege asyryp, klassıkalyq bı óneri baǵytyndaǵy jas daryndardyń esimin anyqtap, klassıkalyq, halyq jáne zamanaýı bıdiń eń ozyq dástúrin damytyp, oryndaý sheberligin arttyrýdy basty mindet etip belgiledi. Sondaı-aq eldiń horeografııalyq óneri men bilim berý isiniń básekege qabilettiligin arttyryp, ımıdjin qalyptastyrý úshin de bul baıqaýdyń máni zor. 2018 jyly bul baıqaý IýNESKO-nyń qamqorlyǵyna alynǵan aty ańyzǵa aınalǵan áıgili Iýrıı Grıgorovıch jetekshilik etetin Halyqaralyq balet baıqaýlary federasııasynyń múshesi mártebesin ıelendi. Dástúrli túrde ótip kele jatqan halyqaralyq baıqaý 150-den asa qatysýshynyń basyn qosyp, geografııalyq aýqymyn jyl saıyn keńeıtip keledi. Bıylǵy baıqaýda Qyrǵyzstan, О́zbekstan, Reseı, Ońtústik Koreıa elderiniń úmitkerleri baq synady.
«О́rleý» baıqaýy horeografııalyq bilim berý salasynda dıdaktıkalyq-ádistemelik mindet arqalaıdy. Bıylǵy VIII maýsym Qazaqstannyń halyq ártisi, kórnekti balet bıshisi Sara Kósherbaevanyń 90 jyldyq mereıtoıyna arnalyp otyr. Buǵan qosa, «Seleznev oqýlary» halyqaralyq ǵylymı-zertteý konferensııasy «Qazaq horeografııalyq óneri men bilim berý isiniń kórnekti qaıratkerleri» jáne «Ulttyq horeografııalyq óner jáne bilim berý isiniń ózekti máseleleri» atty taqyrybyna arnalyp, balet óneriniń maıtalman mamandary Dáýren Ábirov pen Bolat Aıýhanov sekildi ulttyq balet óneri biregeı tulǵalarynyń shyǵarmashylyǵyn jan-jaqty taldap, eńbegine baǵa berdi. «Qazaq, qyrǵyz jáne ózbek bıleriniń úlgisindegi túrki halyqtary halyq bıleriniń uqsastyǵy men ereksheligi» atty taqyryppen konferensııanyń kórnekilik bólimi Almaty, Bishkek jáne Tashkent horeografııalyq ýchılısheleriniń pedagog mamandarynyń qatysýymen ótti. Baıqaý aıasynda Qazaqstan jáne shetel horeografııalyq óneriniń jetekshi mamandary sheberlik sabaqtaryn uıymdastyrdy. Fransııanyń «Ruée des Arts» bı ujymynyń zamanaýı horeografııa boıynsha kórsetken sheberlik sabaǵyn osy sala sańlaqtary joǵary baǵalady.
Baıqaý tarıhynda birinshi ret sońǵy týr, sondaı-aq aýqymdy gala-konsert Almaty Theatre-dyń sahnasynda ótip, oǵan almatylyq kórermender men qala qonaqtary qatysty. «Klassıkalyq bı», «Halyq bıi», «Zamanaýı bı» atalymy boıynsha úlken, orta, kishi top laýreattary anyqtalyp, «Sara Kósherbaeva atyndaǵy úzdik oryndaýshy», «Dáýren Ábirov atyndaǵy úzdik oryndaýshy» júldesi jáne «Bolat Aıýhanov atyndaǵy arnaıy júlde», «Jeńiske degen jigeri úshin», «Kórermender kózaıymy», Adam men Gúlnara Qapanovtardyń arnaıy júldesi aıryqsha talantymen top jarǵan jas daryndarǵa tabystaldy.
ALMATY
