Is-shara áıgili kompozıtor Áset Beıseýov sazyn jazǵan aqynnyń «Maraldym» ánimen ashyldy. Keıinnen aqynmen jaqyn aralasqan qalamgerlerdiń estelikteri beınesıýjet arqyly kórsetildi. Oqyrmandar konferensııasyna beınebaılanys arqyly qosylǵan Qazaqstan Respýblıkasy Ulttyq mýzeıiniń ǵylymı hatshysy, tarıh ǵylymdarynyń kandıdaty Saıalbek Ǵızzatov Ulttyq mýzeıdiń atynan mektep-lıseıge 25 kitap joldaıtynyn jetkizdi.
«Qazaq ádebıetiniń alyby, ult poezııasynyń shoq juldyzy Muzafar Álimbaevtyń shyǵarmalaryn jasóspirimder qaı kezde de oqyp ósýi kerek. Jalpy, balalardyń qazaqtyń keshegi jáne búgingi kórkem ádebıetimen bir kisideı tanys bolýy úshin qoldan kelgen jumystardy atqaryp jatyrmyz. Mektepte ádebı keshterdi jıi uıymdastyramyz. Sol arqyly olardyń rýhanı qundylyqtyń bulaǵynan sýsyndap ósýine den qoımaqpyz», deıdi mektep dırektory Erbol Qaıpuldaev.
Taǵylymy mol is-sharada sóz alǵan kitaphanashylar Gúlbaıra Tanysqojaeva, Altynaı Álimbekova Muzafar Álimbaev shyǵarmalarynyń tárbıelik máni, poetıkalyq qýaty týraly jasóspirimderge mol málimet berse, qazaq tili men ádebıeti pániniń muǵalimi Bazarkúl Toqtaǵanova arnaý óleńin oqydy.
Oqyrmandar konferensııasynda sóz alǵandar Muzafar Álimbaevtyń shyǵarmashylyǵy týraly áńgimelep qana qoımaı, búgingi jas qalamgerlerdiń týyndylary týraly pikirlerin de ortaǵa saldy.
Jambyl oblysy,
Turar Rysqulov aýdany, Lýgovoı aýyly
