Elmıra – Azııa chempıony!

31 jastaǵy Soltústik Qa­zaqstan oblysynyń týmasy buǵan deıin de óz jankúıerlerin talaı ret qýantqan edi. Elmıra 2016 jyly Brazılııanyń Rıo-de-Janeıro qalasynda alaýy tutanǵan Olımpııa oıyndarynda qola medaldi moınyn­da jarqyratty. 2018 jyly Ja­kartadaǵy Azııa oıyndarynda da dál sol mejeden kórindi. 2014-2021 jyldar aralyǵynda ót­ken qurlyq chempıonattarynda 1 altyn, 2 kúmis jáne 3 qolany qorjynǵa saldy. Ol basqa da kóptegen halyqaralyq týrnırde top jardy.

Astanadaǵy jarys­ta Syz­dyqova Jaqsylyq Úshkempi­rov atyndaǵy jekpe-jek sara­ıyna jınalǵan jurtty teń­dessiz ónerimen tamsandyrdy. Alǵashynda ózbekstandyq Ozoda Zarıpboevany aıqyn basymdyqpen jeńse, ile-shala qytaılyq Jýan Vandy ońaı eńserdi. Fınalda onyń joly Aıperi Medetqyzymen qıysty. Qyrǵyz qyzy qandasymyzdan alty jas kishi. Onyń ústine, Medetqyzy sońǵy kezderi halyqaralyq arenada tolaǵaı tabystarǵa qol jetkizip júr. Atap aıtsaq, Jakartadaǵy Azııa oıyndarynda, Belgradtaǵy Álem kýboginde jáne Oslodaǵy álem chempıonatynda úshinshi tuǵyrǵa kóterildi. Sońǵy úsh qurlyq birinshiliginde júlde aldy. Máselen, 2020 jyly Nıý-Delıde, 2021 jyly Almatyda kúmispen kúptelse, 2022 jyly Ulanbatyrda aldyna jan salmady.

Kórshiles eki eldiń beldi ba­lýandary uzaq ýaqyt tiresti. Ekeýi qansha tyryssa da, bir-birin ala almady. Báseke bel ortadan aýǵan tusta qarsylasynyń sál bosańsyǵan sátin sátti paı­da­lanǵan Elmıra ony jerge alyp urdy da, ústine qona ket­ti. Aıperi qaýipti jaǵdaıdan quty­lýdyń barlyq amalyn jasady. Biraq ol qazaq balýanynyń temir qursaýynan shyǵa almady. Sóıtip, Elmıra Syzdyqova Azııa chempıony atandy.

55 kılo salmaqtaǵy Marına Sedneva jartylaı fınalda mońǵolııalyq Otgontýıa Shın­boldtan utylǵanymen, qola medal úshin tartysta sheberlik­tiń shynaıy úlgisin kórsetti. Tóreshi belgi bergen bette bir­den shabýyldaǵan ol birneshe upaı enshiledi. Vetnamdyq Tı Mıý Trang Ngýen de osal emes eken. ­Ol da lezde laıyqty jaýap qaı­tar­­dy. Básekeniń bastalǵanyna nebári ­­­30 sekýnd ótkende tablodaǵy ­esep 9:6-ǵa jetti. Sol mezette ­Marına ońtaıly tásilin júzege asy­ryp, qarsylasynyń aıaǵyn kókten keltirdi. Nátıjesi – taza jeńis jáne qola medal.

Jankúıerler 68 kılo salmaq dárejesinde kúsh synasqan Elena Shalygınanyń bozkilemge shyqqan sátin taǵatsyzdana kútti. 36 jastaǵy ardager sportshy kezinde Olımpııa oıyndary men úsh birdeı álem chempıonatynda jeńis tuǵyryna kóterilgen. Azııa chempıonattarynda 2 altyn, 2 kúmis jáne 1 qolany enshilegen.

Shalygına Astanadaǵy jarysty jeńispen bastady. Biraq shırek fınalda ózinen 15 jas kishi, jalyndap turǵan jas japonııalyq Amı Ishııge áli jetpedi. Shyny kerek, úshinshi oryn úshin tartysta da biz jer­lesimiz jeńiletin shyǵar dep oıladyq. О́ıtkeni bul mejede onyń joly Tokıo Olımpıadasy men Azıadanyń qola júldegeri, álem chem­pıony, Álem kýboginiń ıegeri, qurlyq chempıony Meıi­rim Jumanazarovamen qıysty. Osy ataqtyń barlyǵyna qyr­ǵyz qyzy 23 jasqa tolmaı-aq qol jetkizdi. Biraq Meıirim­niń jaraqat alýyna baılanysty báseke merziminen buryn toqtatylyp, jeńis Elena Sha­lygınaǵa berildi.

Osylaısha, áıelder kúresi­nen ótken jarystyń alǵash­qy kúnin Qazaqstan quramasy 1 altyn jáne 2 qola medalmen qorytyndylady. Bizdiń ba­lýandar arasynan Ellada Mahıad­dınova (50 kılo) men Dıana Kaıýmova (59 kılo) el senimin aqtaı almady.