Jaǵymdy jańalyq týraly Sıfrlyq damý mınıstri Baǵdat Mýsınniń «Microsoft»-tyń elimizdegi bas dırektory Sergeı Leshenkomen ekijaqty kezdesýi barysynda belgili boldy.
Hab qyzmeti Ortalyq Azııa, Ázerbaıjan, Armenııa, Grýzııa, Mońǵolııa, Pákistan elderin qamtıdy dep kútilip otyr.
– «Microsoft» qyzmetin lokalızasııalaý Qazaqstanǵa aımaqtyq aýqymda tehnologııalar men ozyq sheshimderdi tartý ortalyǵyna aınalýǵa múmkindik beredi. Osylaısha, hab «Microsoft» korporasııasynyń tehnologııalyq damý jáne ınnovasııalar ortalyǵy bola otyryp, shıkizattyq emes tehnologııalyq salalardyń ónimderin óndirý men eksporttaýdy yntalandyrý arqyly adamı kapıtaldy damytý jáne ulttyq ekonomıkany nyǵaıtýdyń draıveri bola alady, – dedi Baǵdat Mýsın.
Mınıstr ótken jyly Memleket basshysy Qasym-Jomart Toqaev BUU Bas assambleıasynyń 77-sessııasy aıasynda Nıý-Iorkke jasaǵan sapary aıasynda «Microsoft» kompanııasynyń Ortalyq jáne Shyǵys Eýropa boıynsha bas dırektory Mıshel Sımmonspen kezdesý ótkizip, onda qazaqstandyq ókildikti aımaqtyq habqa aınaldyrý máselesi kóterilgenin jetkizdi. Sol kezde el Prezıdenti Úkimetke osy bastamany jandandyryp, ony júzege asyrýǵa qajetti jaǵdaı jasaý mindetin júktegen.
– Osy ýaqyt ishinde Syrtqy Ister mınıstrliginiń jáne elimizdiń San-Fransıskodaǵy bas konsýldyǵynyń, sondaı-aq «Microsoft» korporasııasynyń qazaqstandyq ókildiginiń qoldaýymen bul máseleni sheshý boıynsha belsendi jumystar júrgizildi. Kremnıı alqabyna saparym barysynda da bul máseleni umyt qaldyrǵan joqpyz. Endi, mine, bizge qabyldanǵan sheshim jóninde resmı túrde habarlandy, – dedi mınıstr.
«Microsoft» kompanııasynyń Qazaqstan boıynsha bas dırektory Sergeı Leshenkonyń aıtýynsha, elimizde «Microsoft»-tyń aımaqtyq habynyń qurylýy mańyzǵa ıe. «Qazaqstanda tıisti ınfraqurylym bar. Biz birlesken jobalardy iske asyrýǵa daıynbyz», dedi ol.
Sondaı-aq kezdesýde korporasııanyń ChatGPT sııaqty kóptegen servısterinde qazaq tiliniń qoldaný aıasyn keńeıtý máselesi talqylandy.
