Kezdesýde sóılegen sózinde Máýlen Áshimbaev depýtattar parlamentaralyq ózara is-qımyldy jandandyrýǵa septigin tıgize alatyn basym baǵyttardy atap ótti. Bul baǵyttaǵy negizgi mindetter transshekaralyq ózenderdiń ekojúıelerin saqtaý, esirtkiniń zańsyz aınalymymen birlesip kúresý jáne shekara mańy yntymaqtastyǵyn damytý máseleleri bolyp belgilendi.
«Qazaqstan men Reseı arasyndaǵy qarym-qatynas tabysty jáne tıimdi ekijaqty ózara is-qımyldyń jarqyn úlgisin kórsetip keledi. Eki eldiń yntymaqtastyǵy berik dostyq pen tatý kórshilikke, ǵasyrlar boıy qalyptasqan tarıhı baılanystarǵa, memleketterimizdiń táýelsizdigine, egemendigine jáne aýmaqtyq tutastyǵyna qurmetpen qaraýǵa negizdelgen», dedi Máýlen Áshimbaev.
О́z kezeginde Federasııa Keńesiniń tóraǵasy Valentına Matvıenko eki memlekettiń ózara is-qımylynyń joǵary deńgeıine erekshe nazar aýdardy. Bul rette Qazaqstan Parlamenti Senaty men Reseı Federaldyq Jınalysy Federasııa Keńesi arasyndaǵy Yntymaqtastyq jónindegi komıssııa osyndaı baılanystyń mańyzdy tetigi bolyp otyrǵanyn atap ótken jón. Sondaı-aq Valentına Matvıenko el Prezıdenti Qasym-Jomart Toqaevtyń bastamasymen Qazaqstanda júrgizilip jatqan keń aýqymdy saıası jáne ekonomıkalyq reformalardyń ózektiligin tilge tıek etip, eki memleket arasyndaǵy qarym-qatynasty odan ári dáıekti túrde damytýdyń mańyzdy ekenin aıtty.
«Reseı men Qazaqstan – shyn máninde teń quqyly odaqtas memleketter. Bizdi kóp nárse baılanystyrady. Biz Qazaqstannyń damý barysyna únemi nazar aýdaryp otyramyz. Qazaqstan Prezıdenti Qasym-Jomart Toqaev júrgizip jatqan saıası jáne ekonomıkalyq reformalar joǵary qurmetke laıyq. Olardyń kásibı, demokratııalyq jáne halyqpen dıalog negizinde júrgizilip jatqanyn atap ótken jón. Sondaı-aq parlamentaralyq ózara is-qımyldy odan ári nyǵaıtýǵa múddeli ekenimizdi jetkizgim keledi», dedi Valentına Matvıenko.
Sonymen qatar kezdesýde qazirgi zamanǵy qalalardy damytý salasynda eki Palatanyń ózara is-qımylynyń ózektiligi sóz boldy. Osyǵan oraı Máýlen Áshimbaev byltyr Qazaqstanda «Aglomerasııalardy damytý týraly» zań qabyldanǵanyn, soǵan baılanysty bul baǵytta ınjenerlik ınfraqurylymdy jańǵyrtýǵa erekshe kóńil bólinip otyrǵanyn aıtty.
Qazaqstan Parlamenti Senaty men Reseı Federaldyq Jınalysy Federasııa Keńesi arasyndaǵy Parlamentaralyq Yntymaqtastyqty damytý jónindegi arnaıy jol kartasy da ózara qarym-qatynasty odan ári nyǵaıtýǵa tyń serpin berýge tıis. Qujat aldaǵy 3 jylǵa eseptelgen. Onyń basty mindeti – qyzmettiń naqty nátıjelerine mán bere otyryp, Parlamentter yntymaqtastyǵynyń qoldanbaly quramdas bóligin kúsheıtý.
Sonymen qatar Máýlen Áshimbaev pen Valentına Matvıenko Parlament Senaty men Federasııa Keńesiniń Yntymaqtastyq jónindegi komıssııasynyń otyrysyna qatysty. Otyrysty ashqan Máýlen Áshimbaev Qazaqstan men Reseı senatorlarynyń kezdesýi 12 sáýir – Ǵaryshkerler kúninde ótip otyrǵanyna nazar aýdaryp, osydan 62 jyl buryn qazaq jerinen Iýrıı Gagarın adamzat tarıhynda alǵash ret ǵaryshqa ushqanyn aıtty. Senat tóraǵasy qazirgi tańda eki eldi bul baǵytta Baıqońyr ǵarysh aılaǵy biriktiretinin atap ótti. Onyń aıtýynsha, búginde bizdiń elderimiz arasynda osyndaı deńgeıdegi jemisti ózara is-qımyl kóptegen baǵyt boıynsha damyp keledi.
Máýlen Áshimbaev shekara mańy yntymaqtastyǵyn nyǵaıtý qajettigine jáne transshekaralyq sý nysandaryna qatysty ózekti máselelerdi sheshýdiń mańyzdylyǵyna da erekshe toqtaldy.
«Transshekaralyq ózenderdiń ekojúıelerin saqtaý – mańyzdy máselelerdiń biri. Bizdiń elimizdiń birqatar óńiri úshin bul áleýmettik, ekonomıkalyq jáne ekologııalyq mánge ıe. Sondyqtan qazaqstandyq qoǵam osy baǵytqa erekshe kóńil bólip otyr. Soǵan baılanysty Yntymaqtastyq jónindegi komıssııanyń kelesi otyrysyn osy jyldyń kúzinde transshekaralyq ózender aǵyp jatqan Qazaqstannyń shekaralas oblystarynyń birinde ótkizýdi usynǵymyz keledi. Bul maqsatta Oral qalasyn qarastyrýdy usynamyz. Osylaısha, senatorlar jergilikti jerde máseleniń mán-jaıymen jaqyn tanysyp, tıisti memlekettik organdardy tyńdap, birlesken usynystar ázirleýge múmkindik alady», dedi Máýlen Áshimbaev.
Sonymen birge Qazaqstan Parlamenti Senatynyń delegasııasy Máskeý Soborlyq meshitine bardy. Senatorlar meshit basshylyǵymen kezdesip, qazirgi qoǵamda joǵary rýhanı-adamgershilik qundylyqtardy ilgeriletýdegi dinı kóshbasshylardyń rólin talqylady. Osy oraıda Álemdik jáne dástúrli dinder lıderleri seziniń dinaralyq dıalogti damytýǵa, halyqtar arasyndaǵy beıbitshilik pen kelisimdi nyǵaıtýǵa qosqan úlesi de áńgimege arqaý boldy.
Resmı sapardyń alǵashqy kúninde senatorlar «Belgisiz jaýynger beıiti» memorıalyna gúl shoǵyn qoıý rásimine qatysty.
