Paıǵambarymyz (oǵan Allanyń salaýaty men sálemi bolsyn): «Kimde-kim Allaǵa ıman keltirip, saýabyn Alladan úmit ete otyryp, Qadir túnin qulshylyqpen ótkizetin bolsa, onyń ótken barlyq kúnálary keshiriledi», degen (Buharı).
Al qasıetti Qurannyń «Dýhan» súresiniń 3-aıatynda bul túnniń berekege toly tún ekendigi baıandalady. Islam ǵalymdary osy aıat pen hadısterge súıene otyryp, kimde-kimniń qulshylyǵy, duǵa-tilegi myń aıdan da qadirli qadir túnine, sol sátke sáıkes keletin bolsa myń aı qulshylyq jasaǵandaı, bálkim odan da kóp saýapqa keneledi dep tujyrymdama jasaǵan.
Demek, bul túni kóbirek qulshylyq jasaýǵa, Alladan bilip jáne bilmeı istegen kúnálar úshin táýbe etip keshirim suraýǵa, kóbirek Quran oqýǵa, Paıǵambarymyzǵa salaýattar aıtyp kún batqannan tań atqanǵa deıin ýaqytty qulshylyqpen ótkizýge den qoıý qajet.
