Ishmaıdan kir sabyn jasaıdy

Meıirlan men Dýmannyń sehy aýlada ornalasqan. Kúnine 500 kesek kir sabyn shyǵarady. Osydan eki aı buryn bastaý alǵan jumys qazir qarqyn alyp keledi. Ideıaǵa túrtki bolǵan ınternettegi Ulan Qurmanǵalıevtiń arnasy eken.

– Internetten birshama málimet, aqparat jınaı kele, «osy ózimiz nege kir sabyn jasap kórmeske?» degen oı keldi. Sodan Almatyǵa baryp, arnaıy dáris tyńdadyq. Qajetti qural-jabdyǵyn da satyp aldyq. Sabynnyń negizgi quramy – maı. Qospalarynda aıtarlyqtaı hımıkat joq. Bul – taza tabıǵı ónim. Jobamyz eki aı jumys istep keledi. Sodan beri sabyn shyǵarýdy tolyq meńgerdik, – deıdi Meıirlan. 

Joǵaryda aıtyp ótkenimiz­deı, suranys joǵary. Qazir Qarqaraly aýdany aýmaǵynda saýdaǵa shyqqan. Kúnine 500-1000 dana sabyn satylady. О́nim tap­syrys kólemine qaraı shyǵarylady.

Memleketten ázirge eshbir qoldaý almaǵan kásipkerler aldaǵy ýaqytta oblys ákimi grantyna ótinish berýge múddeli. Eger grant alsa, sabynnyń syrtqy oraýyn jolǵa qoımaqshy. Keleshekte jumysty jandandyra túsip, aýyl turǵyndaryn jumysqa tartýdy da kózdep otyr.

«Aldaǵy ýaqytta iri saýda ortalyqtaryna sabynymyzdyń satylýyna ruqsatqa qol jetkizsek, bul da bir jetistik bolar edi. Endi sol maqsatqa jetý úshin áreket etemiz», deıdi Meıirlan.

Sabyn «Jańatoǵan» markasymen shyǵady. Bul – aýyldyń ataýy. Salmaǵy  úsh túrli: 150, 200 jáne 250 gramm kóle­minde. Sapa sertıfıkatyn alǵan soń kásipkerler jobaǵa qýat bermekshi. Taǵy bir atap aıtar­lyǵy, bul kir sabynnyń baǵa­sy ortasha naryqtyq qunnan birsha­ma, ıaǵnı on paıyzǵa arzan.

Buǵan deıin kásipkerler aýdan ákimi grantyn utqan. Sóıtip qymyz óndirisin iske qosypty. Onymen toqtap qalmas úshin sabyn shyǵarýdy qolǵa alǵan jónderi bar. Sabynnyń negizi maldyń ish maıy bolǵandyqtan, turǵyndar kásipkerlerge ish maıdy ákep ótkize bastapty.

Qarqaraly aýdanynyń turǵyny Aıjan Qypshaqbaeva «Jańatoǵan» sabynyn tutynyp kórgen kóptiń biri. Aıtýynsha, ózge sabyndar sekildi emes. Olardan sapalyraq. Jaǵymsyz ıisten ada.  Kir jýǵanda ony ashýy da jaqsyraq.

«Cabynnyń túsi de, ıisi de jaq­sy. Múldem ıis joq dese de, artyq emes. Keı sabyndarda bir bóg­de ıis shy­ǵyp turady ǵoı ádette. My­na «Ja­ńatoǵan» sabynynda ondaı ıis múl­dem sezilmeıdi. Qaıbir sa­byn­­dar sekildi ezilip te  ketpeıdi. Uzaq ýa­qytqa jetedi», deıdi aýyl turǵyny.

Kásipkerler keleshekte sa­byn­dy áli de jetildirýdi kózdeıdi.

Qaraǵandy oblysy,

Qarqaraly aýdany,

Jańatoǵan aýyly