«Qujat Prezıdent Jarlyǵymen bekitilgen Qazaqstan Respýblıkasynyń memlekettik qarjysyn basqarýdyń 2030 jylǵa deıingi tujyrymdamasyn iske asyrý jónindegi is-sharalar josparyn iske asyrý aıasynda ázirlendi jáne Ulttyq qordyń aktıvterin basqarý prosesin retteıdi», delingen Ulttyq banktiń baspasóz qyzmeti taratqan aqparatta.
QUB ázirlegen Tujyrymdama ınvestısııalyq saıasatty, Ulttyq qordaǵy aktıvterdi basqarýdyń negizgi qaǵıdattary men tásilderin aıqyndaıdy. О́z kezeginde Ulttyq qordy qalyptastyrý jáne paıdalaný, ıaǵnı, memlekettik qarjyny basqarý máseleleri MQBT erejelerimen aıqyndalady.
Tujyrymdamada aktıvterdi strategııalyq allokasııalaýdy júzege asyrý úshin qajetti Ulttyq qor qarajatyn uzaqmerzimdi ınvestısııalaý qaǵıdaty belgilengen. Bul táýekeldi jáne qorǵanys aktıvter klasyn quramdastyryp qoldanýǵa múmkindik beredi. Ulttyq qordaǵy jınaq portfeliniń úlesi kelesideı bólinedi: 60% – oblıgasııalar, 30% – aksııalar, 5%-ǵa deıin – balama quraldar jáne 5%-ǵa deıin – altyn.
Jańasha bólý oblıgasııalar portfelin damyǵan elderdiń memlekettik oblıgasııalaryna, korporatıvtik oblıgasııalarǵa jáne damýshy elderdiń memlekettik oblıgasııalaryna da ártaraptandyrýdy kózdeıdi.
Sonymen qatar Tujyrymdama ınvestısııalyq prosestiń negizin qalaıdy jáne Ulttyq qordaǵy aktıvterdi basqarý tıimdiliginiń kórsetkishterin anyqtaıdy. Qujatta belgilengen qaǵıdattar men tásilder ınvestısııalyq portfeldi ártaraptandyrý, qorǵanys strategııalary men faktorlyq ınvestısııalardy, sonyń ishinde ESG qoldanýdy qosa alǵanda, negizgi strategııalar men quraldardy aıqyndaý arqyly Ulttyq qordyń kiristiligin arttyrýǵa baǵyttalǵan.
Osylaısha, Tujyrymdamany ázirleýdegi maqsat – QUB-tyń uzaqmerzimdi ınstıtýsıonaldyq ınvestor retindegi mártebesin rastaý úshin qajetti irgetasty nyǵaıtý jáne negizderdi bekitý. Tujyrymdamany iske asyrý, ıaǵnı, onda belgilengen shekteýlerdi, qaǵıdattar men tásilderdi saqtaý 2030 jylǵa qaraı 100 mıllıard AQSh dollaryn jınaqtaý maqsatyna qol jetkizýge jáne «Ulttyq qor – balalarǵa» baǵdarlamasynyń tabysty jumys isteýine yqpal etedi.
