Elektrli samokat – eki nemese úsh dońǵalaǵy bar jeke kólik túri. Oryndyqtary joq bul qurylǵy tek bir adamnyń qozǵalysyna arnalǵan. Maksımaldy jyldamdyǵy saǵatyna 25 shaqyrymnan aspaıdy.
Onyń aldyńǵy, búıirlik jáne artqy jaryq shaǵylystyrǵyshtary bolýy shart. Sondaı-aq elektrli samokattarda aldyńǵy faralar men artqy shamdar bolýy kerek. Aınaladaǵy adamdarǵa óziniń jaqyndaǵany týraly eskertý jasaý úshin kóliktiń bul túrinde dybystyq qurylǵy bolýy mańyzdy.
Samokatty paıdalaný erejesi:
- qozǵalys baǵytyna jaqsylap sholý jasap, uıaly telefon nemese basqa gadjetterdi paıdalanbańyz;
- kólik quralyn eki qolyńyzben ustańyz, toqtaıtyn bolsańyz – asyqpaǵan jón;
- elektrli samokatty qarańǵy, tar jáne kedergileri bar jerde qoldanbaǵanyńyz abzal;
- kólik kóp júretin jerler men adamdar jınalatyn oryndardan aýlaq bolyńyz;
- elektrli samokatty qoldaný kezinde basyńyzdy, bilek pen shyntaǵyńyzdy jáne tizeńizdi qorǵaıtyn quraldardy umytpańyz;
- júk pen jolaýshylardy tasymaldaýǵa bolmaıtynyn esten shyǵarmańyz;
- jol júrisi qaǵıdalaryn saqtaı otyryp, óz traektorııańyz ben qozǵalys jyldamdyǵyńyzdy tańdap alyńyz;
- jaıaý júrginshige nemese velosıpedshige ózińizdiń jaqyndaǵanyńyz týraly habar berińiz;
- jaıaý júrginshiler ótkelinen kólik quralynan túsip ótińiz.
IIM jolaýshylardy saq bolýǵa shaqyrdy.
«Elektrli samokatty únemi tehnıkalyq tekserýden ótkizip turý kerek. Jolda saq bolyńyzdar», delingen habarlamada.
