Shampionat.com saıtynan alynǵan málimetke qaraǵanda, Mbappe Fransııa chempıonatynyń 31-týrynda «Lanspen» ótken matchta 31-mınýtta gol soqty. Osylaısha, Kılıan «PSJ» quramynda Fransııa birinshiliginde soqqan gol sanyn 139-ǵa jetkizdi. Bul kórsetkish jóninen ol ýrýgvaılyq shabýylshy Edınson Kavanıden (138) asyp tústi. Shvesııalyq Zlatan Ibragımovıch (113) úshinshi orynda.
Mbappe bıylǵy maýsymda Fransııa chempıonatynda 20 ret kózge túsip, mergender kóshin bastady. «Lıon» klýbynan Aleksandr Lıakazet pen Djonatan Devıdtiń («Lıll) esebinde 19 doptan bar.
Sondaı-aq Mbappe osy maýsymda Eýropanyń úzdik 5 chempıonatynda gol sanyn 20-ǵa jetkizgen tórtinshi oıynshy atandy. Osyǵan deıin buǵan Erlıng Holand, Garrı Keın jáne Vıktor Osımhen qol jetkizgen edi.
Bıylǵy maýsymda 24 jastaǵy fransııalyq shabýylshy «PSJ» quramynda barlyq týrnırlerde 35 match ótkizip, 31 gol soǵyp, 7 ret nátıjeli pas berdi.
