Sátbaev qalasynyń Sanjar Slanbek esimdi jasóspirimi eki aıdan beri Túrkııada em qabyldap jatyr. Ol 2016 jyly týǵan. Aýyr naýqasqa ushyraǵan onyń emaqysy da ájeptáýir somany quraıdy eken.
Jeksenbide qalanyń belsendi jastary, jas kásipkerler men blogerler Sanjarǵa járdemdesý maqsatynda jármeńke ótkizdi. Olar jármeńkege qarapaıym kúndelikti tutynatyn zattardy satýǵa shyǵaryp, jınalǵan qarajatty Sanjardyń emine aýdardy.
Jármeńkege qala ákimi Shapaǵat Áýbákir arnaıy at basyn bura keldi. «Qalany aralap júrgende kóshe boıynan jastardyń jarnamasyn kózim shalyp qalǵan edi. Sondyqtan az da bolsa úlesimdi qosaıyn dep keldim», degen qala basshysy birneshe oqý quralyn, t.b. zattar satyp aldy. Ol sol jerde turyp telefon arqyly Sanjardyń ózimen sóılesip, tezirek saýyǵyp ketýine tilektestigin jetkizdi.
Jastardyń jaqsylyq jármeńkesinde 1 mln teńgeden asa qarajat jınalypty. «Kóp túkirse – kól» degen osy.
Abdolla DASTANOV,
jýrnalıst
Ulytaý oblysy,
Sátbaev qalasy
