...Nurlan Sanataevty kemedegi jumysyna ómir tolqyndarynyń ózi qaqpaqyldap ákelgendeı. 1993 jyly 10 qyrkúıekte Mańǵystaý oblysynyń Beıneý aýylynda ómirge kelgen ol Y.Altynsarın atyndaǵy orta mekteptiń 9 synybyn bitirgen soń kásiptik lıseıde oqyp, operator mamandyǵyn alady. 2011-2012 jyldary Lýgovoı stansasyndaǵy №42062 qurlyq áskerı bóliminde Otan aldyndaǵy azamattyq boryshyn ótep, týǵan aýylyna oralǵan soń turaqty jumys tabyla qoımaıdy. Júk tasymaldaýshy, kúzetshi, júrgizýshi syndy jumystardy tapqanymen, tabysy az ári keıbiri merzimdik, maýsymdyq jumystar bolyp shyǵady. Nurlan kóp oılana kele 2015 jyly týǵan kúninde Aqtaýdaǵy №21814 áskerı bólimimen kelisimshartqa qol qoıyp, ártekti kemeler dıvızıony «Saryarqa» zymyran artıllerııalyq bóliminiń tehnıgi bolyp ornalasady. Eki jyl tehnık bolyp teńizdegi áskerı ómir, kemedegi jaýapkershilik týraly biraz tártip-talapqa úırenip qalǵan N.Sanataev 2017 jyly atalǵan bólimniń top basshysy bolyp taǵaıyndalady. Araǵa 4 jyl salyp qyzmetine tııanaqty jas jigitti basshylyq keme bosmany – bas starshına etip taǵaıyndaıdy. Qazir N.Sanataev kemeniń ishki tazalyǵy, tamaq, kórpe-tósek, kıim-keshek, arqan, kater, zákir, tamaqtyń saqtalýy syndy jaýapty mindetter júktelgen qyzmetti shyrq úıirip júr.
«О́zim qurlyq áskerinde boldym, qyzmetke ornalasqan soń kememen teńizge alǵash shyǵý ońaı bolǵan joq, teńiz aýrýymen aýyryp turdyq. Qazir jumysyma ábden úırendim, ózime unaıdy, 8 jyl boıy turaqty osy «Saryarqa» kemesindemin. Keleshekte bilimimdi jetildirip, kelisimshart merzimin uzartqym keledi», deıdi Nurlan Qarjaýuly.
Qys mezgilinde teńizge sırekteý shyqqanymen kún jylynysymen aptasyna 2-3 ret, keıde aptalap teńizde bolady. Asa jaýapty qyzmetke ornalasqan soń oblystyń eń shalǵaı aýdanyndaǵy ata-anasyn Aqtaýǵa kóshirip ákelgen bolatyn, búginde qara shańyraqtaǵy «ata-ana qolyndaǵy bala» atanǵan Nurlannyń otbasynda kishkentaı uly men qyzy ósip keledi.
«Saryarqa» kemesimen túrli áskerı halyqaralyq saıystarǵa qatysyp júrgen Nurlan: «Áli birinshi oryn buıyrmaı tur», dep kúledi aýyl balasyna tán ańqyldaǵan adaldyqpen. 2016 jyly Tájikstanda ótken halyqaralyq «Teńiz kýbogi» saıysynda dodaǵa qatysýshy «Oral» kemesine qosymsha bosman retinde baryp, ekeýi 2-oryndy mise tutsa, 2017 jyly osy saıys Bakýde ótip, «Saryarqa» ekıpajy 2-orynmen oraldy. Araǵa eki jyl salyp Ázerbaıjan astanasynan taǵy da 2-oryndy enshilese, 2021 jyly Iranda ótken saıysta sýdan qutqarý kezeńi boıynsha «Saryarqa» kemesiniń toby 1-oryndy ıelendi, al 2022 jyly keme toby «Teńiz kýbogi» halyqaralyq saıysynan 2-orynnyń jalaýyn jelbiretip oraldy.
Mańǵystaý oblysy
