Ákim halyqqa jaqyn bolýǵa tıis

Pikir ıeleri arasynda sol mańdaǵy tal-daraqtyń alynyp tastalatynyna ókinish bildirýshiler de, bıliktiń basqa kóshelerge kóz qyryn sa­lýyn suraǵandar da bar eken. Ile-shala ótken Qoǵamdyq keńes otyrysynda oblys ákimi Nurlybek Nálibaev osyǵan qatysty baılamyn aıtty. Mem­leket basshysy Qasym-Jomart Toqaev bekitken «Halyq únine qulaq asatyn memleket» tujyrymdamasyna saı ǵımarat qorshaýy alynyp, ornyna jańa saıabaq salynady.

«Halyqtan qymtanyp, tyǵylyp otyrmaımyz. Ákimdik qorshaýynyń bárin alyp, park etip jasaımyz», dedi aımaq basshysy. Beıbarys sul­tan kóshesiniń qos dańǵyldyń ortasyn­daǵy osy bóligine sýburqaqtar salynyp, oryndyqtar ornatylady. Jurt emin-erkin serýendeıtin saıabaq kúzde paı­dalanýǵa beriledi.

Táýelsizdik jolyn tańdaǵaly beri talaı ótkelden ótken qoǵamnyń bas­ty baılyǵy birlik edi. Biraq keıingi jyldary osy qundylyqtyń da qoldan sýsyp bara jatqany baıqalyp qalady. Ortalyqtan el arasyna anda-sanda bir shyǵatyn shendilerdiń kezdesýge qalyń nókerin erte keletini qara­paıym halyqtan irgesin aýlaq sala bas­taǵanynyń belgisi edi. Jergilikti ákimdikter men basqa da quzyretti mekemelerdiń jurttan jerip, boı jetpes qorshaýdy tasalanyp alǵany da bılik pen buqara arasyn sýyta bergeni belgili. Biraq keshegi qaharly qańtar qorshaýdyń eshqashan qorǵan bolmasyn kórsetip ketken joq pa?

Jalpy, Syr óńirinde bıliktiń el­men etene bolýy úshin jasalǵan qa­dam az emes. Osy ýaqytqa deıin oblys ákiminiń 30-ǵa jýyq jeke qabyldaýyna 600-den astam turǵyn kelipti. Qabyldaýda jedel sheshilýge tıis keıbir máselelerge oraı tıisti oryndarǵa shuǵyl tapsyrmalar berildi. Odan bólek, Prezıdent Jarlyǵyna sáıkes aımaq basshysy oblystaǵy quqyq qorǵaý organdary jetekshilerimen birge qala men aýdanda turǵyndarmen kezdesti.

Mundaı kezdesýlerde jeke máse­le­ler­men qatar elge ortaq prob­lemalar da kóteriledi. Mysaly, Ja­l­aǵash aýdanynda ótken kezdesýde Myr­zabaı ahýn aýylyna jańa emhana salý jóninde usynys aıtqan eldi meken turǵynyna nysannyń qury­lys-smetalyq qujattamasy ázir­­le­nip, jaqyn arada qurylysy basta­latyny aıtyldy. Syrdarııa aýda­nyn­daǵy Qoǵalykól aýyly men oblys ortalyǵyn jalǵaıtyn joldyń tozyǵy jetkendigin aıtqan eldi me­ken turǵyny Dáýlet Qyrdannyń piki­rin eskergen aımaq basshysy má­se­leniń sheshimin qarastyrýdy tap­syr­dy. «Oblys ákimimen kezdesýden keıin aýdan ákimdiginen meniń usy­nysym boıynsha jaqyn arada jóndeý jumystary bastalatyny jaıly hat keldi. Kóp jyldan beri sheshimin tappaǵan máseleniń eskerilgenine qýanyshtymyn», deıdi aýyl turǵyny.

Qalanyń irgesindegi «Eńbek» saıajaıyn qonystanǵan turǵyndar aýyz sý, tabıǵı gaz ben elektr jaryǵy sekildi ıgilikterden qur qalyp otyr edi. Bul másele de bılik pen halyqtyń tikeleı baılanysynyń arqasynda sheshimin tapty.

Osy jyly 22 aqpanda ótken jeke qabyldaýda saıajaı turǵyndarynyń ótinishin tyńdaǵan oblys basshysy Nurlybek Nálibaev qala ákimi men oblystyq energetıka jáne turǵyn úı kommýnaldyq sharýashylyǵy bas­qar­masynyń basshysyna saıajaı aýma­ǵyn­daǵy ınfraqurylym máselesin muqııat zerttep, 10 naýryzda elektr jaryǵyn júrgizýdi mindettegen edi. El tilegi aıaqsyz qalǵan joq. Aıtylǵan merzimde saıajaıda ınfraqurylym tartý bastalyp ketti. Ortalyq 3 kó­she­ge 2,8 shaqyrym kabel men 36 ja­ryqsham baǵany ornatyldy. Sóz ben istiń úılesim tapqanyn kórsetetin bul jumystar demeýshiler qarjysy esebinen júzege asyryldy.

Ashyqtyq qaǵıdaty aıasynda oblys ákiminiń orynbasarlary, qala, aýdan ákimderi men oblystyq basqarma basshylary eldi mekenderdi aralap, qoǵamdyq qabyldaý ótkizip júr. Aımaq basshysynyń tapsyrmasymen bas­qar­ma, qala jáne aýdan ákimdikteri, olardyń birinshi basshylary áleýmettik jelilerde resmı paraqsha ashyp, tur­ǵyndar usynys-pikir, saýaldaryn tikeleı aıtyp, jaýabyn onlaın rejim­de ala alady.

Osyǵan deıin jumyspen barǵa­ny­myz­da ákimdikke muńyn aıta kelip, qorshaýdan óte almaı qajyǵan jurtty talaı kórgenbiz. Qazir turǵyndar oblys ákiminiń qabyldaýyna egov portaly, e-otinish biryńǵaı bazasy arqyly tirkele alady. Ákimdikke kelip jazbasha ótinish tastaý arqyly da jazylýǵa bolady.

Byltyr oblys ákimi qyzmetine ta­ǵa­ıyn­dala sala ótkizgen alǵashqy jıynda Nurlybek Nálibaev ákim apparatynda shtattaǵy jáne shtattan tys keńesshi laýazymdary bolmaıtynyn málimdegen edi. «Budan ári oblys ákiminiń shtattaǵy jáne shtattan tys keńesshi laýazymdary bolmaıdy. Kez kelgen adamǵa keńesshi degen kýálikti tarata berýdi qoıýymyz kerek. Bizdiń keńesshimiz – halyq!», degen oblys ákiminiń elge jaqyn bolýdaǵy bastamasyn kópshilik qoldaıdy.

Qazir qarapaıym halyq pen bıliktiń arasyn bólip turǵandaı kórinetin qorshaý alyna bastady. Endi ǵımaratyn aınaldyra qorshap, syrtqa bıik dýaldan syǵalap qarap otyrǵan jergilikti quqyq qorǵaý mekemeleri de elmen etene bolýdyń osy qadamyna qosylsa, quba-qup bolar edi.

Qyzylorda oblysy