Separatıster jazasyz qalmaıdy

Úı ishinen úı tikpek bolyp, sepa­ra­tızmdi nasıhattaǵandarǵa qatysty másele qoǵamda úlken daý týǵyzǵan edi. Osyǵan baılanysty oblystyq polısııa departamenti men Ulttyq qaýipsizdik komıteti departamentiniń tergeýshilerinen jedel-tergeý toby da quryldy. Keshe Soltústik Qazaqstan oblystyq prokýratýrasy ótkizgen brıfıngte «Ha­lyq keńesi» dep atalǵan toptyń úsh belsendisiniń qamaýǵa alynǵany aıtyldy.

«Separatızmdi nasıhattady dep kúdikke ilingen toptyń ústinen eki qyl­mys­tyq is qozǵaldy. Is Qylmystyq kodekstiń 180-baby 2-bóligi bo­­ıynsha Qazaqstan Respýblıkasynyń birtutastyǵy men tutastyǵyn ydyratýdy nasıhattaý nemese oǵan jarııa túrde buqaralyq aqparat quraldaryn jáne telebaılanys jelilerin shaqyrý arqyly materıaldardy taratý jáne Qylmystyq kodekstiń 179-baby boıynsha memlekettiń qaýipsizdigin ydyratýdy úgitteý boıynsha sarap­tal­ǵan. Bul aýyr qylmystar sanatyna kiredi. Oǵan 10 jylǵa deıingi merzimge bas bostandyǵynan aıyrý túrindegi balamasyz jazalaý qoldanylady. Toptyń negizgi úsh fıgýranty ýaqytsha ustaý ızolıatoryna qamaýǵa alyndy», dedi Soltústik Qazaqstan oblysy prokýratýrasy basqarmasynyń bastyǵy Ǵanı Jalbı.

Saıasattanýshy men basqa da mamandar qatysqan komıssııalyq psıho­lo­gııa­lyq-fılologııalyq sot saraptamasy beınejazbadan separatızm belgilerin anyqtap, qorytyndy shyǵardy.

«Tergeý barysynda Petropavl qalasynda 2023 jylǵy 19 naýryzda Soltústik Qazaqstan ýnıversıteti kol­ledjiniń ǵımaratynda oblys orta­lyǵynyń 20 azamatynan turatyn «Halyq keńesi» degen toptyń jınalys ótkeni, olar ózderin «Keńes sosıalıstik respýblıkalar odaǵynyń izbasarlarymyz» dep, kózqa­ras­taryn bildirgendigi anyqtaldy. Jıynǵa bireýi kámelet jasyna tol­ma­ǵan balasymen kelgen. Qalǵan 16 adam jumystarynan shettetilgen joq, qyzmetterin jal­ǵas­ty­ryp jatyr. Olar boıynsha sheshim qabyldanǵan joq. Kinási dáleldengen jaǵdaıda ja­zaǵa tartylady. Tergeý barysy qatań baqylaýda. Kimniń qaıda ju­mys isteıtini týraly, qalaı bul topqa qosylǵany týraly aqparat Qylmystyq-pro­ses­tik kodekstiń 201-babyna sáıkes ázirge jarııalaýǵa jatpaıdy. Qazirgi ýaqytta tergeý áreketteri jalǵasyp jatyr, jınalysqa qatysqan basqa tulǵalarǵa qatysty obektıvti jáne jan-jaqty quqyqtyq baǵa beriledi», dedi Ǵanı Jalbı.

Esterińizde bolsa, naýryzdyń aıa­ǵynda áleýmettik jelide «Halyq keńesi» dep atalatyn toptyń vıdeosy keń tarap, qoǵam narazylyǵyn týǵyzǵan edi. Osyǵan baılanysty Ulttyq qaýipsizdik komıtetiniń Soltústik Qazaqstan oblysy boıynsha departamenti separatızm faktisi boıynsha sotqa deıingi tergep-tekserý bastaǵan bolatyn. Sol kúni oblys prokýratýrasynyń nus­qaýy boıynsha Ultyq qaýipsizdik komıteti, polısııa, Ekonomıkalyq tergeý departamenti, oblystyń Sybaılas jemqorlyqqa qarsy qyzmet mamandarynan vedomstvoaralyq jedel-tergeý toby qurylyp, prosestik prokýrorlar taǵaıyndaldy.