Májilis spıkeri korporasııa basshylyǵyn Qazaqstandaǵy qyzmetiniń 30 jyldyǵymen quttyqtap, «Shevron» elimizdegi iri sheteldik ınvestor ekenin atap ótti. Erlan Qoshanov Qazaqstan Prezıdentiniń, Úkimet pen Parlamenttiń basty mindeti – ulttyq múddelerdiń saqtalýyn eskere otyryp, sheteldik ınvestorlar úshin qolaıly jaǵdaı jasaý kerek ekenin aıtty. Osyǵan baılanysty «Shevron» kompanııasyna birqatar usynys jasady. Atap aıtqanda, aýaǵa taraıtyn zııandy qaldyqtardy azaıtý, munaı hımııasyn damytý, munaı men gaz óńdeýdi kúsheıtý.
«Elimizdiń úlesin arttyrýǵa basa nazar aýdaryp, jergilikti ónimdi satyp alý mańyzdy. Jergilikti servıstik kompanııalardy tartý kerek. Qazaqstanda damyǵan jáne básekege qabiletti bıznes bar. Olar ozyq halyqaralyq standarttar deńgeıinde jumys isteı alady. Búginde bul baǵytta biraz jumys atqarylyp jatyr. Degenmen aýqymdy rezerv te bar. Budan esh tarap utylmaıdy», dedi Májilis spıkeri.
Erlan Qoshanov taıaýda ótken saılaý naýqany kezinde depýtattardyń Qazaqstannyń batys oblystaryndaǵy turǵyndarmen ótken kezdesýinde kótergen túıtkildi máselelerge de toqtaldy. Sonyń biri – Atyraý oblysynyń Dossor eldi mekenindegi jáne Qulsary qalasyndaǵy apatty jaǵdaıdaǵy turǵyn úı máselesi men halyqty áleýmettik qoldaý. Budan bólek, jergilikti jumysshylarǵa laıyqty jaǵdaı jasap, ádil eńbekaqy tóleý, vahta merzimin qysqartý, jergilikti kadrlardy daıarlaýdy kúsheıtý máselesi de keńinen qozǵaldy.
«Búginde elimizde munaı-gaz salasynda bilikti mamandar jeterlik. Biraz jerlesimiz sheteldiń bedeldi oqý oryndarynda bilim alyp, transulttyq kompanııalarda tájirıbe jınaqtady. Osyǵan baılanysty jergilikti mamandarǵa sheteldik áriptestermen birdeı jalaqy tólep, olarǵa senim artýyńyzdy suraımyz», dedi Palata tóraǵasy.
О́z kezeginde Derek Magness kompanııanyń eń basty resýrsy adam ekenin atap ótti. Ol jergilikti kadrlardy damytýǵa ınvestısııa salýǵa, sondaı-aq kompanııa ornalasqan osy aımaqtyń damýyna qoldaý kórsetýge daıyn ekenin jetkizdi. Ol Májilis tóraǵasyna kompanııanyń depýtattar tarapynan aıtylǵan barlyq usynysqa muqııat qaraıtynyn jetkizdi.
Sóz sońynda Erlan Qoshanov «Shevron» kompanııasynyń basshylyǵyn jergilikti turǵyndardyń ózekti máselelerin sheshýge jáne aımaqty damytýǵa belsene atsalysýǵa shaqyrdy. Kezdesýge Májilis depýtaty Ádil Jubanov (Atyraý oblysynan), Edil Jańbyrshın (Mańǵystaý oblysynan) qatysty.
