«Búgingi tańda ulttyq ekonomıka qolaısyz syrtqy jaǵdaılarǵa beıimdele otyryp, ornyqty ósý jolyna shyǵyp otyr. Syrtqy kúrdeli ahýalǵa qaramastan, 2022 jyly ekonomıkamyzdyń naqty ósýi 3,2%-dy qurady. Elimizge $28 mlrd tikeleı sheteldik ınvestısııalar tartylyp, 18% ósim qamtamasyz etildi. Negizgi kapıtalǵa salynǵan ınvestısııalardyń naqty kólemi 8%-ǵa ulǵaıdy. Syrtqy saýda aınalymy 32%-ǵa ósip, $134 mlrd boldy», dedi Úkimet basshysy.
Onyń aıtýynsha, jumys isteıtin shaǵyn jáne orta kásipkerlik sýbektileriniń sany 27%-ǵa artyp, 1,8 mln-nan asty. Osy sektorda jumyspen qamtylǵandardyń jalpy sany 13%-ǵa ósip, 3,9 mln adamǵa jetti. Nátıjesinde ekonomıkadaǵy ShOB úlesi qazirdiń ózinde 36%-dy qurady (bir jyl buryn 33,5%).
Úkimet basshysy bıyl qabyldanǵan sharalar ekonomıkanyń turaqty damýyn qamtamasyz etýge múmkindik bergenin atap ótti.
Máselen, qańtar-naýryz aılarynda IJО́-niń naqty ósimi 4,9%-dy qurady. Barlyq negizgi baǵyttar boıynsha oń dınamıka qalyptasyp otyr: qurylysta – 16% saýdada – 12% kólik salasynda – 8% óńdeý ónerkásibinde – 5,4% ósim tirkeldi. Negizgi kapıtalǵa salynǵan ınvestısııalardyń naqty kólemi úsh aıda 16%-ǵa, al memlekettik bıýdjet kirisi 24%-ǵa artty.
Bul óz kezeginde, bıylǵy jylǵa arnalǵan respýblıkalyq bıýdjetti naqtylaý kezinde áleýmettik tólemderge, densaýlyq saqtaý men bilim berý salalaryn, naqty sektor men ınfraqurylymdy damytýǵa qosymsha 2,2 trln teńge bólýge múmkindik berdi. Sondaı-aq Qazaqstannyń halyqaralyq rezervteri $94 mlrd qurady.
Atap aıtqanda, ótken jyldyń basynan beri Ulttyq qordyń aktıvteri $3 mlrd-qa ósip, $58 mlrd-qa jetti.
Premer-mınıstr halyqaralyq reıtıngtik agenttikter Qazaqstannyń ınvestısııalyq reıtıngin senimdilik deńgeıinde rastaǵanyn, al Standard&Poor's agenttigi bıylǵy naýryz aıynda ekonomıkamyzǵa qatysty óz boljamyn jaqsartqanyn aıtty.
