«Strategııalyq nysandar» uǵymyn aıqyndaý tásilin qaıta qaraý qajet. Bálkim, aımaqtyq mańyzy bar strategııalyq nysan uǵymyn engizý kerek shyǵar. Bul – álemdik tájirıbe. Bárin oılanbaı ózgerte berý ekonomıkalyq qaýipsizdikke nuqsan keltirýi múmkin. Qazirgi geosaıası jaǵdaıda bul máseleniń ózektiligi tipti arta tústi.
Qazaqstan salmaqty jáne derbes ekonomıkalyq saıasat júrgizýi kerek. Qoǵamdyq resýrstar qoljetimdi bolýy úshin ashyq aýksıon qaǵıdattaryn basshylyqqa alý qajet. Bıznes ókilderi barlyq mindettemelerin adal oryndaý úshin tıimdi baqylaý júıesin ornatý kerek», dedi Qasym-Jomart Kemeluly.
Prezıdent ekonomıkany monopolııadan aryltý týraly jıi aıtady. Búgin de osy máselege toqtalyp, aktıvterdi elge qaıtarý jumystaryn taza júrgizýdi ári olardyń qaıtadan bireýdiń qaltasyna túspeýin qadaǵalaýdy tapsyrdy.
«Monopolısterge qarsy qozǵalǵan ister boıynsha sapaly jumys atqarylýǵa tıis. Ol úshin qazylardyń bilikti bolýy asa mańyzdy. Qazir zańsyz shyǵarylǵan aktıvterdi memleketke qaıtarý jumysy jandana tústi. Qaıtarylǵan aktıvter men múlikter qoldy bolyp ketpeýi kerek», dedi ol.
