Prezıdenttiń aıtýynsha, tarıfti ósirýden túsken qosymsha qarjy tek qana kommýnaldyq ınfraqurylymdy jańǵyrtýǵa jumsalýy kerek. Sondaı-aq jańa qýat kózderin iske qosýǵa jáne jumysshylardyń jalaqysyn kóterýge baǵyttalýy qajet.
«Monopolısterdiń mindetteri muqııat naqtylanyp, tolyǵymen oryndalýǵa tıis. Sondyqtan Úkimetke qarjynyń jumsalýyn baqylaıtyn qatań amal-tásilder engizýdi tapsyramyn. Oǵan sıfrlyq baqylaý júıesin de engizý kerek. Jurt kommýnaldyq qyzmet úshin tólegen aqshasy qaıda ketip jatqanyn kórip otyrýǵa tıis. Qazirgi zamanǵy aqparattyq tehnologııa buǵan tolyq múmkindik beredi», dedi Prezıdent.
Sondaı-aq ol janar-jaǵarmaıdyń baǵasyn kóterý máselesi týraly sóz etti.
«Túsken qarjyny deldaldar, ıaǵnı alypsatarlar ıemdenip ketpeýi qajet. Ony jańa munaı-gaz jobalaryn júzege asyrýǵa jáne munaı óńdeý zaýyttaryn jańǵyrtýǵa jumsaý kerek. Sondyqtan Úkimet munaı ónimderiniń baǵasyn qaıta qaraý kezinde memleketke tólenetin salyqty arttyrý jóninde qosymsha sharalar qabyldaýǵa tıis. Jalpy tarıf saıasaty boıynsha Úkimetke taýarlar men qyzmetterdi retteıtin «tutynýdyń áleýmettik normasyn» engizý máselesin pysyqtaýdy tapsyramyn. Bul – halyqaralyq tájirıbe», dep qosty Memleket basshysy.
Sondaı-aq Prezıdent barlyq qarajat tolyǵymen ekonomıkany damytýǵa jumsalýy qajet ekenin atap ótti. Osy oraıda ol qarjyny qaıtaryp, elimizdi órkendetýge atsalysqysy keletin azamattarǵa qarata bylaı dedi:
«Jańa ındýstrııalyq jobalarǵa qarjy salyńyzdar. Qazaqstanda jańa óndirister ashyp, jańa jumys oryndaryn quryńyzdar. Sonda mundaı aktıvterge jáne onyń ıelerine qatysty eshqandaı másele týyndamaıdy. Taǵy da qaıtalap aıtamyn. Biz adal ári ashyq jumys isteıtin bıznes ókilderine barlyq jaǵdaıdy jasaımyz», dedi ol.
