Depýtattar Aqmola oblysynda

Parlament Májilisiniń bir top depýtaty Elbasynyń qańtardaǵy Joldaýyn halyqqa túsindire túsý jáne besinshi shaqyrylymnyń zań shyǵarýshylyq qyzmetinen habardar etý maqsatynda Aqmola oblysynyń aýdandarynda kezdesýler ótkizýde. Májilis depýtattary A.Mılıýtın, E.Kap­pel, I.О́mir­za­qov Selınograd aý­danyndaǵy qurylys obek­tile­rinde boldy. Qosshy aýylynyń mektep qurylysymen tanysyp, aýdandyq jylý qazandyǵyn kórdi. Halyq qalaýlylaryna turǵyndar aýyldyń ishki joldary men tozyǵy jetip qalǵan kópshilik kólikteri jáne ákimshilik otyrǵan eski ǵımarattyń jaǵdaılaryn aıtty. Shortandy aýdanynda bolǵan depýtattar 1200 oryndyq mektep pen aýdandyq aýrýhanada bolyp, máslıhat depýtattarymen júzdesti. Sonymen qatar, «Nur Otan» partııasynyń aýdandyq fılıalynda qoǵamdyq qabyldaýlar ótkizdi. Búgingi kúni mundaǵy aýyz sý máselesiniń ótkir bolyp turǵanyna nazar aýdaryp, mektepke balalardy jańa kólikpen tasý máselesi men aýdandyq balalar aýrýhanasyn kúrdeli jóndeýden ótkizý máselesinen habardar boldy. Arshaly aýdanynda bolǵanda qıyrshyq tas shyǵaratyn zaýytqa baryp, sol jerdiń ekologııalyq jaǵdaıymen tanysty. Depýtattar ekologııalyq jaǵdaıdy jaqsartý úshin birqatar tehnıkalyq sharalar qajettigine keńes berip, ylǵaldandyrǵysh mashınalaryn ornatýdy usyndy. Halyq qalaýlylary Astana – Qaraǵandy avtokólik jolyn salyp jatqan qurylysshylarmen de júzdesti. Sodan keıin depýtattar Arshalydaǵy kásiptik kolledjde bolyp onyń oqýshylarymen jáne ustazdarmen júzdesti, dep habarlady Májilistiń baspasóz qyzmeti.