Halyqqa tazartylǵan altyn quımalardy satý jáne satyp alý baǵdarlamasyn Ulttyq Bank 2017 jyly iske qosqan bolatyn. Baǵdarlama qolǵa alynǵaly beri jalpy salmaǵy 4,2 tonna 122 430 altyn quıma satyldy.
Altyn quımalar bes túrli salmaqta usynylady: 5, 10, 20, 50 jáne 100 g. Satyp alýshylar arasynda óte joǵary suranysqa ıe túri – 10 gramdyq quıma. Jalpy satylǵan quımalar arasynda onyń úlesi 26% – 31 909 dana. Odan keıin 5 gramdyq altyn quıma – 27 547 dana (22%), 100 gramdyq quıma – 25 218 dana (21%), 20 gramdyq quıma – 23 566 dana (19%), jáne 50 grammdyq quıma – 14 190 dana (12%). Altyn quımalar Almaty, Astana jáne Atyraý qalalarynda kóp satylady.
Altyn quımalar senimdi ınvestısııa quraly bola alady. Altyn quımalar naryǵyndaǵy ótimdiliktiń basty kepili – bank pen banktik emes aıyrbastaý pýnkteri klıentke aqshany sol kúni tóleı otyryp, altyn quımalardy keri satyp alsa bolady.
Baǵdarlama bastalǵannan beri ekinshi deńgeıli bankter men banktik emes jekelegen aıyrbastaý pýnkteri jalpy salmaǵy 526,4 keli 20 703 altyn quımany keri satyp aldy. Bul – jalpy satylǵan quımalardyń 17%-y. Olar keri satyp alǵan altyn quımalardyń barlyǵy derlik Ulttyq Banktiń fılıaldary arqyly halyqqa satylady.
«Árbir quıma qorǵaý elementterimen qaptalǵan (quımanyń aına beti, mıkrotekst jáne jıegi bar) jáne arnaıy qorapqa salynyp shyǵady. Sol arqyly quımanyń ashylǵan-ashylmaǵanyn ońaı tekserýge bolady. Qorǵap turatyn qoraby sapa sertıfıkaty bolyp ta sanalady. Sondyqtan altyn quımany uqyppen saqtap, qorabyn búldirmeýge keńes beremiz», delingen habarlamada.
Qazir altyn quımalardy Halyk Bank, Eýrazııalyq Bank, Jusan Bank, SentrKredıt Banki, sondaı-aq banktik emes jekelegen aıyrbastaý pýnkterinen satyp alyp, keri satýǵa bolady.
