Qazaqstan stýdentteri alıansynyń tóraǵasy Ulan Naýkenniń aıtýynsha, stýdentter sleti – jastardyń tájirıbe men bilim almasyp, baılanysty nyǵaıtatyn alańy. Sondyqtan jastar ony asyǵa kútedi.
– Stýdentter alıansy 2005 jyly qurylǵan bolatyn. Sodan beri stýdentter sleti jyl saıyn ótkizilip keledi. О́kinishke qaraı, tek pandemııa kezinde ǵana uıymdastyrylǵan joq. Aýqymdy is-sharany ár óńirde ótkizemiz. Máselen, osyǵan deıin Taraz, Pavlodar, Túrkistan qalalarynda uıymdastyrylǵan jıyndar kópshiliktiń esinde dep oılaımyn. Byltyrǵy jáne bıylǵy sletti Astanada ótkizý týraly sheshim qabyldandy. Bıylǵy is-sharaǵa alıanstyń múshelerinen bólek, stýdenttik ózin-ózi basqarý uıymdarynyń da ókilderi shaqyryldy. Buryn alıansqa joǵary oqý oryndarynyń stýdentteri ǵana múshe bolsa, endi kolledj stýdentterin de qatarǵa qospaqpyz. Sondyqtan bıylǵy is-sharaǵa kolledj stýdentteri de qatysyp otyr, – dedi Ulan Naýken.
Bıylǵy slettiń ashylý saltanaty L.N.Gýmılev atyndaǵy Eýrazııa ulttyq ýnıversıtetinde uıymdastyryldy. Oǵan Parlament Májilisiniń depýtattary, qoǵam belsendileri qatysty. Astana qalalyq Jastar saıasaty máseleleri basqarmasynyń basshysy Qaırat Qambarov pen Aqparat jáne qoǵamdyq damý mınıstrligi Jastar saıasatyn úılestirý komıtetiniń basqarma basshysy Aqulan Tastemir qatysýshylarǵa sáttilik tilep, jastardyń qoǵamdaǵy róline toqtaldy. Sondaı-aq bul kúni TEDx formatynda is-shara uıymdastyryldy. Oǵan qatysqan jýrnalıst Dana Nurjigit, «Jaidarman»-nyń negizin qalaýshy Esen Eleýken, áleýmettik jelilerdiń belsendi qoldanýshysy Nurlan ımam Baıjigituly, akter Dastan Orazaev, aqyn-jýrnalıst Ramazan Esmaǵambetov óz oılaryn ortaǵa saldy.
Stýdentter sletinde Qazaqstan stýdentteri alıansynyń birjyldyq jumysy qorytyndylanyp, jańa joba-josparlar pysyqtaldy. Olar osy kúnderi bilim, mádenıet, sport saıystarynda synǵa túsedi. Sondaı-aq jyl qorytyndysy boıynsha úzdik stýdentter marapattalady. Is-shara aıasynda Ǵylym jáne joǵary bilim mınıstri Saıasat Nurbekpen jáne Oqý-aǵartý mınıstri Ǵanı Beısembaevpen kezdesý josparlanǵan.
