«Qazaqstan álemde janar-jaǵarmaı baǵasy eń arzan elderdiń qataryna kiredi. Onyń ústine sońǵy bes jylda ınflıasııa deńgeıine qaramastan, benzın baǵasy – 2,3%, dızel otyny – 5,3% ǵana ósken. Sondyqtan energetıka mınıstriniń munaı ónimderiniń jańa baǵasy týraly shyǵarǵan buıryǵyna túsinistikpen qaraý kerek», deıdi Batys Qazaqstan oblysynyń energetıka jáne turǵyn úı-kommýnaldyq sharýashylyq basqarmasynyń basshysy Mıras Múlkáı.
Dál qazir Batys Qazaqstan oblysynda jaǵdaı turaqty, eshqandaı shekteý joq. Sońǵy málimet boıynsha, oblys aýmaǵyndaǵy munaı bazalarynda, janar-jaǵarmaı beketterinde 4 100 tonna dızel otyny bar, bul oblystyń 8 táýlik tutynýyna jetkilikti. Sondaı-aq AI-92 markaly benzınniń – 3 021 tonnasy (5 kúndik qor) jáne AI-95 markaly benzınniń – 712 tonnasy (2 kúndik qor) bar.
Batys Qazaqstan oblysyn dızel otynymen qamtamasyz etý kópten sheshilmeı júrgen kúrdeli máseleniń biri. Bir qyzyǵy, oblysta dızel otynyn óndiretin «Kondensat» kompanııasy bar. Ol jylyna 850 myń tonna munaı ónimin, atap aıtqanda, benzın, gazoıl jáne dızel otynyn shyǵara alady. Sonyń ishinde kásiporyn 200 myń tonna jazǵy jáne qysqy dızel otynyn shyǵarýǵa qaýqarly. Alaıda Qarashyǵanaq kenishiniń dál ústinde otyrǵan kompanııa shıkizatqa zar bolyp, nebári 12,2% qýatymen jumys isteýde. Bıylǵy 3 aı ishinde «Kondensat» 26 myń tonnaǵa jýyq munaı ónimin, sonyń ishinde 11 myń tonnaǵa jýyq dızel otynyn óndirgen.
«Búginde kompanııany turaqty shıkizatpen qamtamasyz etý máselesin ortalyq atqarýshy organdar qarastyryp jatyr» deıdi BQO kásipkerlik jáne ındýstrıaldy-ınnovasııalyq damý basqarmasy bastyǵynyń orynbasary Janna Bekqalıeva.
