О́ńirdiń negizgi ekonomıkalyq damýyna ákim jaýap beretin edi. Qazir máslıhattardyń da róli artyp keledi. Olardyń myǵymdyǵyna, durys, ashyq básekelese jumys isteýine naqty talaptar qoıyldy. Mundaı jaǵdaıda máslıhattyń da salmaǵy artyp, jaýapkershiligi eselene túsedi.
Shynyn aıtý kerek, elimizde tórt aımaq qana respýblıkanyń donory. Qalǵany bıýdjet esebinen kún kórip otyr. Memleket basshysy búgin óte ózekti máseleni kóterdi. Kúni-túni oılanatyn kez keldi. Qandaı jaǵdaıda ekonomıkany jaqsartamyz, qaıtsek damımyz? Osyny jan-jaqty talqylaý kerek. Azamattar da bul salmaqty suraqtyń júgin birge arqalaýy qajet.
Ekinshi másele – reformanyń negizgi qara jumysyn atqaratyn aýdan ákimderi. Úlken salmaq solarǵa túsedi. Prezıdent búgingi sózinde aýdan ákimderiniń jaýapkershiligin arttyrý qajet ekenin basa aıtty. Qazirgi tańda geosaıası, áleýmettik, ekonomıkalyq turǵyda kúrdeli kezeńge aıaq bastyq. Qoǵamnyń talaby ózgerdi. Ekonomıkalyq ahýal ýshyǵyp tur. Munyń bári memlekettik apparattan jańa sapany qajet etedi. Búginde halyqqa unaıtyn áńgimeden góri, unamaıtyn áńgimeni – shyndyqty shyrqyratyp aıtý kerek. Soǵan saı, qoǵamǵa atqarylǵan jumysty túsindire bilý qajet.
Memlekettik qyzmetke elimiz úshin ne isteı alamyn, paıdamdy qalaı tıgizemin deıtin kózi ashyq, kókiregi oıaý azamattar kerek. Sondyqtan memlekettik apparat, ásirese aýdan ákimderi kóp eńbek etkeni abzal. О́ıtkeni halyqtyń kópshiligi aımaqtarda. Solardyń talabyna saı bolǵany jón. Qysqasy, olar memleket júrgizip jatqan reformanyń el ishindegi elshisi atanýǵa tıis. Osylardy eskere kele, Memleket basshysy búkil aımaqtyń basshylaryn jınap, keńes ótkizdi.
Jıyn barysynda kóptegen qordalanǵan másele aıtyldy. Buǵan saı naqty tapsyrmalar da berildi. Ony baıyppen, durystap atqarý – memlekettik apparat, Parlament, máslıhattardyń tikeleı mindeti. Bulardy keıinge qaldyrýǵa ýaqyt joq. Saıası reformalardyń negizgi kezeńi ótti, endi sony saıası mádenıetke aınaldyryp, básekelestik dástúrine ákelý – jańa kezeń talaby.
Aıdos SARYM,
Májilis depýtaty
