Kenshilerdiń «Qorǵaý» kásipodaǵynyń tóraǵasy Evgenıı Býslaev mundaı pikir almasý alańynyń tıimdiligin ataıdy. Aımaq basshysynyń tóraǵalyǵymen ótetin bul keńes eki jyl kóleminde jumys istep keledi. Osy aralyqta kenshiler men metallýrgterge jeńildetilgen baspana alýǵa nesıe beriletin bir baılam jasaldy. Budan bólek, ózge de áleýmettik jaǵdaılar túıini birjaqty boldy.
– Bul formattaǵy kelisim komıssııasy óńir basshysynyń tóraǵalyǵymen jumys júrip jatyr. Áýelide kenshiler kompanııaǵa 12 máseleni sheshýge talap qoıdy, keıin jumys barysynda oǵan qosymsha týyndady.
Degenmen búginde kópshiligi oń sheshimin tapqanyn atap ótken jón. Endigi kezekte kómir kásiporyndaryn damytýǵa, jabdyqty jańartýǵa ınvestısııa quıýǵa qatysty iri júıelik máseleler qaldy.
Basty másele – kenshilerdiń zeınet jasyn tómendetý. Bul keńestegi maqsat – taraptar arasynda dıalog ornatý. Tek osyndaı tyǵyz baılanys arqyly ǵana biz máselelerdi ońtaıly sheshemiz. Sonyń nátıjesinde ujymdarda turaqty áleýmettik jaǵdaı ornaıdy, – deıdi Evgenıı Býslaev.
Kásipodaq tóraǵasynyń aıtýynsha, bul kúni kadr tapshylyǵyn tıimdi sheshýde ilgerileý bar. Kompanııa jańa jumys kúshin alýǵa yntaly. Biraq maman tolyqty deýge áli erte. Sol sebepti bul másele de kún tártibinde tur. Kenshi densaýlyǵyna qatysty saýyqtyrý da ózektiligin joımaǵan.
Kenshilerdiń baspana alýyna jeńildetilgen nesıe berýdiń ekinshi kezeńi bastalady. «Otbasy banki» oblystyq fılıalynyń dırektory Baýyrjan Jýaspaı bul maqsatqa 1,5 mlrd teńge qarastyrylǵanyn aıtady. Onyń 1 mlrd teńgesi oblystyq bıýdjetten bólinse, 500 mln teńgesin bank beredi.
Oblys ákimi Ermaǵanbet Bólekpaev kompanııanyń da bul baǵytta qalys qalmaýy qajettigin atady.
– Jumysshylaryńyzǵa kómek berý úshin bul baǵdarlamadan sizder de qalys qalmańyzdar. Atalǵan baǵdarlamaǵa óz úlesterińizdi qosyńyzdar. Sonda baǵdarlamanyń sharapatyn kóptegen otbasy kórýge múmkindik molaıady, – dedi Ermaǵanbet Bólekpaev.
Jalpy, mundaı kelisim komıssııasy udaıy kezdesip, máselelerdi talqylap keledi. Aımaqta bul júıeli jolǵa qoıylǵan.
Qaraǵandy
