«Ákbar aqyn Nızamıdiń otany – Qazaq aýdanynda týǵan. Al shaıyr qypshaq qyzy Appaqqa talaı jyr arnaǵany málim. Sondyqtan ba, Ákbardyń bir búıregi qazaqqa buryp turady, tutas túrki jurtyna jáne adamzatqa ortaq qundylyqtardy arqaý etedi. Búgingi oqyrmanǵa usynylǵan kitap ta tamyrlas ulttyń ádebıetin damytýǵa qosylǵan súbeli úles dep bilemiz», dedi mınıstr.
Kesh tizginin qolǵa alǵan belgili aqyn Dáýletkereı Kápuly Ákbar myrzaǵa qosh keldiń aıtyp, eldiń yqylasyn jetkizdi. Sonymen qatar keshke Tanakóz Tolqynqyzy, Mıras Asan, Saǵynysh Namazshamova, Gúlbaqyt Qasen, Janaıym Aýǵanbaıqyzy, Oljas Qasym, Arman Sherızat syndy Ákbár aqynnyń jyrlaryn qazaqsha sóıletken bir top aqyn qatysty.
«О́mirde aqyndar kóp. Biraq týma adamdyq bolmysyn ómir boıy saqtap ótetin aqyndar az. Men Ákbar Goshalyny sol adamdyq bıik tuǵyrǵa qonǵan, ózi qandaı bolsa, óleńi sondaı mártebeli aqyndar sanatyna jatqyzamyn. Biz Ákbarmen erte kezden tanyssaq ta, onyń shyǵarmashylyǵy jóninde mardymdy dúnıe bilmeppin. «Turannyń bir túp jýsany» atty kitapty aýdarý barysynda Ákbardyń úlken aqyn ekenine kózim jetti», dedi Halyqaralyq «Alash» ádebı syılyǵynyń laýreaty Tanakóz Tolqynqyzy.
Tusaýkeserge qatysqan aqyndar Ákbar Goshalynyń aýdarma óleńderin oqyp, ánshiler qazaqtyń qara dombyrasymen halyq ánderin shyrqady.
«Altaıdan aýǵan arǵymaq,
Tiri jan ony mindi qaı?
Aq kóbikti teńizge,
Jetkenshe tańnan tań qurap,
Júıtkidi jany tynshymaı», dep jyrlaǵan aqynnyń túrkiniń qara shańyraǵynda esimi aspandap, abyroıy artty.
