6 jastan 10 jasqa deıingi eń jas sanattaǵy almatylyq «Adeptus Mechanicus» komandasy joǵary ynta-jigeri, yntymaqtastyq rýhy jáne ózara syılastyǵy úshin «Core Values Award» marapatyn ıelendi. Bastaýysh synyp oqýshylarynyń ınnovasııalyq jobasy men tehnıkalyq ázirlemeleri úzdikterdiń qatarynan tabyldy.
«Play 4 Energy» komandasynyń sapynda óner kórsetken «LEAS» mektebiniń oqýshylary 10-16 jas aralyǵyndaǵy orta sanattaǵy «Robot Design Award» joǵary tehnıkalyq syılyǵyn jeńip aldy. Olar kúrdeli tapsyrmalardy oryndaı alatyn berik ári tıimdi robot jasaý arqyly tamasha baǵdarlamalaý jáne ınjenerlik daǵdylaryn pash etti.
12 jastan 18 jasqa deıingi joǵary sanattaǵy «Motivate Award Finalist» tóreshilerdiń erekshe marapatyna Almaty qalasyndaǵy Respýblıkalyq fızıka-matematıka mektebiniń «AENTA» komandasy ıe boldy. Robottardyń keremet oıynyn jasaýmen qatar, balalar «STEM» mádenıetin belsendi túrde nasıhattap júr jáne óz mektepterinde «FIRST» negizderin engizgen. Halyqaralyq qazylar alqasynyń músheleri atap ótkendeı, bul komanda álemdik arenada joǵary kásibılik kórsetti. Aıta keteıik, buǵan deıin oqýshylar tegin festıvaldar men trenıngter ótkizip, óz qurdastaryna robottehnıka men baǵdarlamalaý negizderin úıretken bolatyn.
– Oqýshylar tamasha nátıjeler kórsetip, elimizdiń abyroıyn asyrdy. Shákirtterimizdiń jeńisine yqpal etken jandarǵa alǵysymyz sheksiz. Bul Qazaqstandaǵy «STEM» damýyndaǵy úlken ári jemisti joldyń basy ǵana, – deıdi «USTEM Robotics» qoǵamdyq qorynyń negizin qalaýshy Nurdáýlet Dosmaǵambet.
Eske sala keteıik, bizdiń qurama osy jyldyń aqpan aıynda Oqý-aǵartý mınıstrliginiń qoldaýymen ótken «FIRST Central Asia» Ortalyq Azııa oıyndarynda jasaqtalǵan bolatyn.
– Jarysta 110 eldiń ókilderi baq synady. Balalarymyzdyń joǵary kásibılik kórsetip, laıyqty marapattarǵa ıe bolǵanyna qýanyshtymyz. Olardyń jarqyn jeńisteri ózge oqýshylar úshin motıvasııa bolary daýsyz, – deıdi «Daryn» respýblıkalyq ǵylymı-praktıkalyq ortalyǵy Pedagogıkalyq sheberlik zerthanasynyń jetekshisi Aıgúl Qaraqulova.
Robottehnıka boıynsha álemdik chempıonatqa barlyǵy 36 myń bala qatysqan. El namysyn 50-ge jýyq oqýshy qorǵady.
