«Wenco» taý-ken kóligi keshenin basqarýdyń avtomattandyrylǵan júıesi sala kásiporyndaryna ónimdilikti arttyrý maqsatynda sharalar qabyldaýdy, naqty ýaqyttaǵy jumys úrdisterin vızýalızasııalaýdy qamtamasyz etedi. Stepnogor óńirindegi Aqsý-2 kásipornynda engizilgen jańa júıeniń artyqshylyqtaryna júıeni paıdalanýdyń qarapaıymdylyǵyn, ashyq kenishtegi qaýipsizdik jáne óndiristik kórsetkishterdiń jaqsarýyn jatqyzýǵa bolady. Munda quramynda altyn kezdesetin ken ashyq ádispen óndiriledi. Jylyna 5 mln tonna ken óndirilip, óńdeýden ótedi. «Altynalmas» kompanııasy qaýipsizdik pen ónimdilikti arttyrýǵa, paıdalaný shyǵyndaryn azaıtýǵa, ashyq kenish tehnıkasynyń qyzmet merzimin uzartýǵa múmkindik beretin sheshimderdi engizý úshin ashyq taý-ken jumystarynda jabdyqty basqarý júıelerin jasaqtaıtyn IT salasyndaǵy álemdik kóshbasshylardyń biri «Wenco» kompanııasymen yntymaqtastyq ornatqan bolatyn.
«Wenco» taý-ken kólik jabdyqtarynyń jumysy týraly derekterdi jınap, ony taldaıdy. Osy arqyly dıspetcherler ken sapasyna qoıylatyn talaptardy eskere otyryp, ken tasıtyn tehnıkalardyń túsirý oryndaryna úlestirýge múmkindik beredi. Sonymen qatar baǵdarlamalyq jasaqtamanyń ıkemdi qurylymy bazalyq júıege ártúrli opsııalardy qosýǵa jol ashady. Onyń qatarynda ekskavatorlarǵa, tıegishterge, býldozerlerge jáne greıderlerge arnalǵan joǵary dáldikti pozısııalaý bar.
Avtomattandyrylǵan júıeni Aqsý-2 óndiristik alańynda tájirıbelik paıdalaný ótken jyldyń qarasha aıynda bastaldy. Qazir ol óndiristik paıdalanýǵa qosyldy. Dıspetcherleýdi Wi-Fi baılanysymen qamtamasyz etý úshin barlyq ónerkásiptik obektilerde (ashyq kenish, ken qoımasy jáne taǵy basqalary) IT-ınfraqurylymy tolyq ornatylǵan. Taý-ken tehnıkasy operatorlaryn, geologterdiń, marksheıderlerdiń, IT-mamandardyń, dıspetcherlerdiń biliktiligin arttyrý maqsatynda qosymsha oqytý júrgizildi. Taý-ken kólik jabdyqtaryna «Wenco» borttyq kompıýterleri ornatyldy. Júıe Aqsý-2-degi 35 kólikke qoıylǵan.
«Júıeniń basty erekshelikteri – ony paıdalanýdyń qarapaıymdylyǵy, úrdisti qadaǵalaý múmkindigi, ashyq kenishtegi qaýipsizdiktiń artýy, ár tehnıka boıynsha jedel jáne jınaqtaý eseptiligin jasaý. Aqparatty avtomatty túrde jınaý onyń tolyqtyǵyna, ýaqytyna jáne dáldigine qol jetkizýge múmkindik beredi. Sonymen qatar dıspetcherlerdiń, júıe úshin derek jınaý, engizý jáne óńdeý sııaqty kúndelikti jumysy aıtarlyqtaı jeńildeıdi. Osylaısha, jalpy ónimdilik artady, qyzmetkerlerdiń jumysy jeńildeıdi», deıdi «Altynalmas AK» AQ avtomattandyrý jónindegi aǵa jobalyq menedjeri Daryn Muńsyzbaev.
Ken aýdarý aımaqtaryndaǵy jumystardy qadaǵalaý maqsatynda tıeý jabdyqtary joǵary dáldikti pozısııalaý júıesimen jabdyqtalǵan. Jedel baqylaý úshin zamanaýı jabdyqtalǵan dıspetcherlik ortalyq uıymdastyrylypty.
«Wenco» baǵdarlamalyq jasaqtamasyn odan ári tehnıkalyq qoldaýdy, tehnıkalyq qyzmet kórsetýdi aqparattyq júıelerdi qoldaý bólimi qolǵa alady. «Altynalmas» ónerkásiptik nysandaryn sıfrlandyrý jáne avtomattandyrý 2017 jyldan bastap iske asyrylyp kele jatqan «Sıfrlyq kenish» baǵdarlamasy sheńberinde júrgizilip jatyr. Ol óndiristik tıimdilikti arttyrýǵa, óndiristik shyǵyndardy tómendetýge, jańa aqparattyq tehnologııalar men quraldardy qoldana otyryp, ozyq tájirıbeler men ınnovasııalyq tásilderdi qoldaný arqyly personaldyń nátıjeliligin jaqsartýǵa baǵyttalǵan. «Wenco» júıesin basqa da óndiris oryndaryna ornatý josparlanǵan.
