Bul kúni II Almaty stansasyna dárigerler men temirjolshylar, sala ardagerleri, óner qaıratkerlerimen qosa bir qaýym el jıyldy.
Mundaı iri jobanyń úılesimdi iske asýyna birdi-ekili emes, birneshe mekeme, qorlar qoldaý kórsetip otyr. Tizbektesek, bul qatarda «Samuryq-Qazyna» AQ kompanııalar tobynyń atynan «Samruk-Kazyna Trust» áleýmettik jobalardy damytý qory, Qazaqstan Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń músheleri, Densaýlyq saqtaý mınıstrligi, «Qazaqstan temir joly» UK» AQ janyndaǵy «Áleýmettik jobalar qory» korporatıvtik qory bar bolsa, «Jibek Joly» telearnasy jobanyń aqparattyq seriktesi atanypty.
Bilseńizder, shalǵaı stansalarǵa jaqyn eldi meken turǵyndaryna kómek kórsetetin «Densaýlyq» poıyzy – dástúrge aınalǵan joba. Igi iske jyl saıyn «Samuryq-Qazyna» AQ qoldaý kórsetip keledi. Sonyń nátıjesinde, byltyr «Densaýlyq» poıyzy 150-ge jýyq stansaǵa aıaldap, 80 649 emdik-keńes bergen. Onyń ishinde 21 867-si kámeletke tolmaǵan bala ekenin eske salamyz. Ashyp aıtsaq, bilikti dárigerler 5 097 adamǵa shaǵyn ota jasap, 26 587 adamǵa stomatologııalyq kómek kórsetken. Joba aıasynda uzyn-sany 389 388 naýqas dárigerlerge qaralǵan. Poıyzda dıagnostıkalyq prosedýraǵa aralasatyn medısınalyq brıgadalarmen qosa, shaǵyn ambýlatorııalyq otalar jasaıtyn 35 maman bar. Naqtyraq aıtsaq, terapevt, hırýrg, jalpy tájirıbe dárigeri, nevropatolog, ýltradybystyq dıagnostıka dárigeri, akýsher, zerthanashy, meıirbıke, rentgenolog, sáýlelik dıagnostıka dárigeri, tis dárigeri, otolarıngolog, psıholog, okýlıst, gınekolog jáne ýrolog bar. Medpoıyzdyń baǵytyn naqtylaǵanda medısınalyq pýnkti joq shalǵaı stansalar basshylyqqa alynǵan.
Osy kúni «Medısınalyq poıyzǵa» aq jol tileýge kelgen «Samruk-Kazyna Trust» áleýmettik jobalardy damytý qorynyń bas dırektory Alfııa Adıeva jobanyń maqsaty, medısınalyq poıyzdyń áleýeti jaıynda aıtyp bergen edi.
– Búgin medısınalyq kómekke zárý shalǵaı aýyldardyń halqy úshin óte mańyzdy kún. О́ıtkeni biz alys aýyldarda aýrýhanalar bolmaıtynyn jáne turǵyndardyń barlyǵy kez kelgen ýaqytta aýdan ortalyǵyna bara almaıtynynan habardarmyz. Al medısınalyq poıyzdyń kómegimen balalarmen qosa eresekterdiń áp-sátte birneshe dárigerden keńes alýǵa múmkindigi bar. Poıyz eń zamanaýı degen medısınalyq qural-jabdyqtarmen qamtylyp, tipti shaǵyn otalar jasaý jaǵy qarastyrylǵan.
Áleýmettik jobalar qorynyń basty maqsaty – «Samuryq-Qazyna» AQ kompanııalar toby kásiporyndary bar óńirlerge erekshe nazar aýdara otyryp, halyqtyń áleýmettik-ekonomıkalyq áleýetin jaqsartýǵa aralasý. Osy jyly bizdegi 7 jobanyń ishinde densaýlyq saqtaý baǵytynda 590 mln teńge qaralǵan «Medısınalyq poıyz» jobasyna erekshe basymdyq berildi, dedi A.Adıeva.
Sapar barysynda medısınalyq poıyz stansalarda birer kún aıaldaıdy. Dárigerler turǵyndardy tek jumys ýaqytynda qabyldaıdy. Aıta ketý kerek, áıelder isteri jáne otbasylyq-demografııalyq saıasat jónindegi ulttyq komıssııanyń bastamasymen alǵash ret poıyz quramyna azamattarǵa psıhologııalyq, quqyqtyq ári medıatıvtik (tatýlastyrý) kómek kórsetetin kásibı jáne tájirıbeli medıatorlar men zańgerler tartylǵan. Ol az deseńiz, poıyzdaǵy mamandar azamattarǵa memlekettik-áleýmettik tólemder boıynsha, zeınetaqy-járdemaqy, áleýmettik tólem jáne ataýly áleýmettik kómek alý máseleleri týrasynda tegin keńes beredi.
Aqparat úshin aıtar bolsaq, «Samruk-Kazyna Trust» qorynyń qaıyrymdylyq bıýdjeti byltyr 10 mlrd teńgege jetken. Qamqorshylar keńesi osy sommaǵa 43 áleýmettik jobany maquldaǵan. Nátıjesinde 500 myń azamatqa, onyń ishinde 55 myń balaǵa jáne aýylda turatyn 95 myń otandasymyzǵa qoldaý kórsetilipti.
