Halyq teatrlarynyń festıvali

Festıval qorytyndysy boıynsha Shalqar aýdandyq Sary Bataquly atyndaǵy mádenıet úıiniń halyq teatry sahnalaǵan «Qaharly kúnderdiń tátti dámi» qoıylymy bas júldege ıe boldy. Aýdan ónerpazdary maıdan dalasyndaǵy medbıke Raýshan men jaýynger Erjannyń mahabbatyn, urys sýretterin barynsha shynaıylyqpen kórsete bildi.

Qazylar alqasyna tóraǵalyq etken Qazaqstannyń Eńbek sińirgen qaıratkeri Bolat Ábdilmanov: «Bú­ginde rýhanı qundylyqtar ózge­rip, jeńil, syrty jyltyraǵan dúnıeler alǵa shyqqan ýaqytta Tahaýı Ahtan­daı alybyn eske alyp, onyń shy­­ǵar­­malaryn kópshilik nazaryna usy­ný­dy uıymdastyrǵan oblys bas­shy­lyǵy, mádenıet basqarmasy, ha­lyq shyǵarmashylyǵy ortalyǵyna rı­za­shylyǵymdy bildiremin. Keı óńir­lerde memlekettik teatrlar qanatyn keńge jaıa almaı jatqanda halyqtyq teatrlar festıvalin uıymdastyrý úlken kóregendiktiń belgisi. Mundaı is-sharalar el ishindegi shyǵarmashylyq ujymdardy ósirýge septigin tıgizedi. Qaı kezde de naǵyz talant el ishinde bolady. Halqymyzdyń mańdaıyna bitken shamshyraqtarynyń kóbinde kásibı bilim bolmasa da, olar tabı­ǵı daryndarynyń arqasynda el súıis­penshiligine bólene bildi. Osy sátti paıdalana otyryp, el basshylaryna halyqtyq teatrlardyń qarjylyq-materıaldyq jaǵdaıyn jaqsartý qajet degen usynys aıtamyn. Sahnada aýyl mádenıetine shyn jany ashıtyn adal azamattar júr. Olarǵa qoldaý qajet», dep atap ótti. Shyndyǵynda da, halyqtyq teatrlardyń ártisteri eńbekaqy almaıdy. Aýyl sahnasynda ónerge beıim, ónerdi qadirleıtin abzal jandar júredi. Teatrdyń bas rejısseri án, terme aıtatyn, boıynda akterlik qabileti bar aýyldasyn sahnaǵa daıyndaıdy.

Aqtóbe oblystyq halyq shyǵarma­shylyǵy ortalyǵy dırektorynyń orynbasary Gúlnar Seıtalınanyń aıtýynsha, óńirdegi 198 mádenıet úıiniń janynda 120 teatr úıirmesi jumys isteıdi. «Osy 120 úıirmeniń 22-sinde halyqtyq ataǵy bar. Bizdiń orta­lyq ótkizgen irikteý kezeńine al­ty ujym qatysyp, Shalqar, Oıyl, Mu­­ǵaljar aýdandyq halyq teatrlary baıqaýǵa jiberildi Halyqtyq teatr­da rejısser men onyń kómekshisine ǵana shtattyq birlik bekitilgen. Ak­terlik quramy ónersúıer aýyl tur­ǵyndarynan quralady. Olar jumystan keıin aýyldyq klýbqa, mádenıet úılerine jınalyp daıyndalady. Bul ónerpazdar festıvalge ǵana qatysyp qoımaı, aýyl mádenıetiniń damýyna úles qosyp otyrǵan jandar. Búginde aýyldaǵy kez kelgen mádenı is-shara olardyń qatysýynsyz ótpeıdi», dep atap ótti.

Qazylar alqasy úzdikterdi bir­neshe atalym boıynsha marapattady. T.Ahtanovtyń «Kúshik kúıeý» komedııa­syn sahnalaǵan Túrkistan oblysy Ordabasy aýdandyq «Temirlan» halyqtyq teatry «Úzdik akterlik ansambl», «Mahabbat muńyn» kórsetken Abaı oblysy Aqsýat aýdandyq teatr­y «Eń úzdik sahnalyq nusqa» atalymyn ıelendi. Sondaı-aq Batys Qazaqstan oblysy Bórli aýdandyq halyq teatry «Eń úzdik debıýt», Qy­zyl­orda oblysy Shıeli aýdandyq ha­lyq­tyq teatry «Eń úzdik ssenografııa» atalymyna laıyq dep tanyldy.

Festıvalge kelgenderdiń eshqaı­sysy qur qaıtqan joq. «Róldi shynaıy somdaǵany úshin» Oıyl aýdandyq mádenıet úıiniń ártisi Sandýǵash Qar­saqbaeva, «Eń úzdik ekinshi plan­daǵy ról» atalymy Qaraǵandy oblysy Shet aýdandyq halyq teatrynyń ártisi Araılym Artyqbaevaǵa, «Eń úzdik áıel róli» atalymy Jambyl oblysy «Dýlatı jastary» teatrynyń ártisi Aıymjan Baýyrjanqyzyna, «Eń úzdik er adam róli» atalymy Mu­ǵaljar aýdandyq halyq teatrynyń ártisi Erbolat Amangeldıevke buıyr­dy. Bar­lyq atalym ıelerine 300 myń teńge kóleminde sertıfıkat tabystaldy.

Festıval aıasynda áıgili ártis Bolat Ábdilmanov halyqtyq teatrlar ártisteri men rejısserlerine birneshe sheberlik sabaǵyn ótkizdi.

Aqtóbe oblysy