Muny Memleket basshysy da atap ótti. Iаǵnı biz etnos uǵymynan áldeqaıda joǵary ult uǵymyna birigemiz. Jańa dáýirge qadam basqan Qazaqstannyń bolashaǵyn birge qurýymyz kerek. Shyn mánisinde, Assambleıanyń eń basty maqsaty – halyqtyń birligi men tatýlyǵyn qamtamasyz etý jáne ózara mádenıetaralyq baılanysta ult negizderin nyǵaıtý.
Assambleıa – qaıtalanbas erekshe ınstıtýt. Ol memlekettik ne etnosaralyq qarym-qatynastardy retteıtin ýákiletti organ emes. Bul – konsýltatıvti organ. Iаǵnı Assambleıa óziniń is-áreketteri arqyly azamattardyń sana-sezimine, olarǵa memleketquraýshy bolmysty engizýge yqpaldasatyn birden-bir orta.
Jıynnyń birinshi kúni bul máseleler jan-jaqty talqylandy. Memlekettik tildiń mártebesi týraly kóp aıtyldy. Basqa etnos ókilderi tarapynan «bilim berý oshaqtary, ásirese balabaqsha men mektep qazaq tilinde oqytýdy júıelese» degen tezıster aıtyldy. Demek bul olar úshin qazaq tiliniń mańyzdy ekenin kórsetedi.
Qoǵamda «Assambleıa tek basqa etnosqa kerek» degen pikirler aıtylyp qalady. Bul – qate uǵym. Assambleıa bárimizge de kerek. Ol tatýlyqty, mádenıetaralyq baılanysty, bir-birimizdiń quqyqtarymyz ben erekshelikterimizdi qurmetteýge kómektesedi. Konsýltatıvti organ elimizdegi dıaspora ókilderiniń qazaq tilin úırenýge degen yntasyn arttyryp, nátıje shyǵarady. Assambleıanyń Prezıdent aıqyndap ketken basty bir baǵyty – barlyq etnosty qazaq ultynyń aıasyna uıystyrý.
Indıra RYSTINA,
Qazaqstan halqy
Assambleıasy Hatshylyǵy
meńgerýshisiniń orynbasary
