Eń ózekti túıtkildiń biri – memlekettik til. Ulys ókilderi qazaq tilin bilýi kerek. Ol úshin tarıhpen izin jalǵap kele jatqan qazaqtyń salt-dástúrlerin, bolmysyn, tanymyn, dilin bilý qajet. Bul – birliktiń bastaýy. Búginde elimizde 40 Dostyq úıi alańy bar. Ol jerde memlekettik tildi úıretetin arnaıy kýrstar ashylǵan. Etnosaralyq qarym-qatynasty nyǵaıtý úshin, turaqtylyqty saqtaý úshin barlyǵymyz bir halyq bolyp jumylýymyz qajet.
Assambleıanyń aýqymdy jelisi qoǵamda turaqtylyqty qamtamasyz etip, Prezıdent reformalarynyń júzege asyrylýyna sep bolýǵa áleýetti. Sebebi etnomádenı birlestikter jergilikti áleýmettik jaǵdaıdy jaqsy biledi. Jyl saıyn Qazaqstan halqy Assambleıasynyń sessııasynda ár aýmaqtan etnomádenı birlestikterdiń ókilderi, Assambleıanyń músheleri jınalyp, oı-pikirin ortaǵa salady. Biz el arasyndaǵy birligimizdi nyǵaıtý, alǵa qoıǵan maqsattarǵa jetý syndy máselelerdi talqylap, naqty baǵytymyzdy aıqyndaımyz.
Biz óskeleń urpaqqa tatýlyq pen beıbitshilikte ómir súrý qanshalyqty mańyzdy ekenin uǵyndyrýymyz kerek. Sebebi onsyz bolashaǵymyz bulyńǵyr bolmaq. Iá, basqa da ekonomıkalyq máseleler barshylyq. Biraq eń basty baılyq – birlik. Birlik bolmaı, tirlik bolmaıdy. Júktelgen mindet pen oılaǵan jospar kóp. Prezıdenttiń maǵan bildirgen senimin aqtaýǵa elime, jerime qyzmet etýge daıynmyn.
Akbarjon ISMAILOV,
Qazaqstan halqy
Assambleıasy tóraǵasynyń orynbasary
