Shynyn aıtý kerek, sessııa erekshe atmosferada ótti. Prezıdent qoǵamdaǵy turaqtylyq pen birlikti arttyrýdaǵy Assambleıanyń róline jan-jaqty toqtaldy. Tereń oılar aıtyldy. Bul búginimizben birge, keleshek damýymyz úshin asa mańyzdy. Memleket basshysy óz sózinde jalpyulttyq birlikti nyǵaıtýdyń joldaryn usyndy. Etnosaralyq kelisimdi nyǵaıtý, ult birligin bekemdeý negizgi basymdyq bolyp qala beredi. Memleketimizde ár etnostyń mádenıeti men tilin damytýǵa, dástúrin dáripteýge barlyq múmkindik bar.
Prezıdent: «Biz bárimiz – bir otbasymyz. Búginde azamattarymyzdyń barlyǵy ózderin úlken ári birtutas qazaq otbasynyń, shyn máninde, qazaq ultynyń múshesi sezinedi. Bul – jalpyulttyq biregeıligimizdiń taǵy bir jarqyn kórinisi», dedi. Rasymen de, Qazaqstan – birtutas memleket, yntymaǵy jarasqan el. Prezıdent ortaq qundylyqtardyń tóńiregine toptasyp, osy bereke-birligimizdi arttyrýǵa shaqyrdy. Osy oraıda bes basymdyqty atap ótti. Birinshi – birligimiz ben yntymaǵymyzǵa syzat túsirýge baǵyttalǵan kez kelgen arandatýshylyqtyń jolyn kesý. Ekinshi – etnoáleýmettik shıelenistiń saldaryn joıý. Úshinshi – kópmádenıetti ortany damytý jáne barlyq azamattardyń memlekettik tildi meńgerýi. Tórtinshi – Assambleıanyń saıası partııalarmen jáne memlekettik organdarmen ózara is-áreketin kúsheıtý. Besinshi – memlekettik etnıkalyq saıasatty birizdendirý jáne dáıekti júzege asyrý.
Memleket basshysynyń júrgizip otyrǵan saıasaty da, qolǵa alǵan reformalary da osyǵan baǵyttalǵan. Ádildikke bastaǵan jol kúlli ultymyzdy uıystyryp otyr. «Men buǵan deıin de aıttym: elimizdiń táýelsizdigi jáne aýmaqtyq tutastyǵy bárinen qymbat. El birligi osy myzǵymas qundylyqtarmen qatar turýǵa tıis. Sonda ǵana bolashaǵymyz baıandy bolady», dedi Memleket basshysy.
Halqymyz «Birlik túbi – bereke»dep beker aıtpaǵan. Sondyqtan Prezıdent aıtqandaı, bárimiz bir týdyń astyna biriksek qana, Táýelsizdigimiz baıandy bolady. Osy jolda bar kúsh-jigerimizdi salaıyq!
Erlan QOShANOV,
Májilis tóraǵasy
