Qazirgi ýaqytta Qazaqstanda taýarlyq gazdyń ortasha bólshek saýda baǵasy turǵyndar úshin 22,06 teńge/m3 quraıdy. Taýarlyq gazǵa turǵyndarǵa arnalǵan shekti kóterme baǵalar 15%-ǵa ósken kezde Qazaqstandaǵy bólshek saýda baǵalar óńirge baılanysty 1,1-den 3,87 teńge/m3-ge deıin (QQS-ty eseptemegende) ósedi, ortasha ósim shamamen 2,7 teńge/m3 quraıdy (QQS eseptemegende).
Taýarlyq gazǵa shekti kóterme baǵalardyń ósýi taýarlyq gazdy jetkizý qunynyń ósýine, taýarlyq gaz óndirisiniń 2019 jyly 33,1 mlrd m3-ten 2022 jyly 27,8 mlrd m3-ke deıin tómendeýine jáne ishki naryqta taýarlyq gazdy tutynýdyń 2019 jyly 15 mlrd m3-ten 2022 jyldyń qorytyndysy boıynsha 19,3 mlrd m3-ke deıin ósýine baılanysty.
Buıryqtyń jobasy Qazaqstan Respýblıkasynyń óńirlerin gazben jabdyqtaýdyń ekonomıkalyq jáne áleýmettik jaǵdaılaryn eskere otyryp, árbir oblys, respýblıkalyq mańyzy bar qala, astana úshin jyldarǵa bóle otyryp, 2023 jylǵy 1 shildeden bastap 2028 jylǵy 30 maýsymdy qosa alǵan kezeńge ishki naryqta taýarlyq gazdy kóterme saýdada ótkizýdiń shekti baǵalaryn belgileýdi kózdeıdi. Qazaqstan Respýblıkasynyń zańnamasyna sáıkes shekti kóterme baǵalardyń ósýi bir kúntizbelik jyl ishinde 15%-dan aspaýǵa tıis.
Qujat «Gaz jáne gazben jabdyqtaý týraly» Qazaqstan Respýblıkasy Zańy 20-babynyń 3-tarmaǵyna sáıkes 15 mamyrdan keshiktirilmeı bekitiledi.
