Jumys tobynyń jetekshisi, «QazMunaıGaz» AQ basqarma tóraǵasynyń orynbasary Dáýletjan Hasanovtyń aıtýynsha, «О́zenmunaıgaz» kompanııasynda qyzmetkerlerdi jalǵan jumysqa ornalastyrý faktileri anyqtaldy. Máselen, aqtaýlyq belgili aıtysker aqyn shtatta aldymen, teolog, keıinnen qoǵammen baılanys jónindegi maman qyzmetinde tirkelgen.
«Shtatqa personaldy kezekten tys nemese biliktilik talaptaryna sáıkes kelmeıtin jáne jóndeýge qatysty arnaıy mamandyqtar boıynsha jetkilikti jumys tájirıbesi joq adamdardy qabyldaý faktileri bar», dedi D.Hasanov.
Onyń aıtýynsha, birqatar júk kólikteriniń GPS derekterin ýaqyt kestelerimen salystyrǵanda, málimettiń sáıkes kelmegeni anyqtalǵan. Iаǵnı avtomobılder naqty júrip ótken ýaqyt aralyǵyn tabelderde asyra kórsetken. Tıisinshe, atqarylǵan jumys úshin tólem de asyra baǵalanǵan.
Sondaı-aq munaı óndiretin jabdyqty jalǵa alý qyzmetiniń quny birneshe ese joǵary etip kórsetilgen jaǵdaı da kezdesipti. Mysaly, servıs kórsetetin kompanııalardyń biri «О́zenmunaıgazǵa» ámbebap elektr ortalyqtan tepkish sorǵyny táýligine uńǵymaǵa 96 myń teńge baǵamen jalǵa bergen. О́ńirdegi basqa munaı óndirýshi kompanııanyń dál osyndaı sorǵyny jalǵa berý baǵasy budan 2 ese arzan, táýligine 39,7 myń teńgege teń.
QMG basqarma tóraǵasynyń orynbasary satyp alý salasynan taǵy bir mysal keltirdi. Atap aıtqanda, «О́zenmunaıgaz» uńǵymalardy jóndeýge arnalǵan 14 dana kótergish agregat satyp alǵan. Mámileniń jalpy somasy 1,5 mlrd teńgeden asyp jyǵylady. Jetkizý merzimi – 2022 jyldyń 31 jeltoqsany. Tekserý barysynda kórsetilgen merzimde 14 agregattyń bireýi ǵana jetkizilgeni anyqtaldy. Esep berý qujattamasynda ony jańa dep kórsetken. Biraq tekseris nátıjesinde onyń komponentteri áldeqashan eskirgeni, kóptegen bólshekteriniń joq ekeni, qýat konstrýksııalary paıdalanýǵa qaýipti ekeni anyqtaldy. Muny jasyrý úshin tot basqan korpýsy men shassıdiń metall konstrýksııalary qara túske boıalǵan.
Jumys toby óndiristik jáne ekologııalyq qaýipsizdik normalaryn buzǵan jaǵdaılardy joıý úshin «О́zenmunaıgaz» ben munaı servıs kompanııalaryna usynystar men tapsyrmalar berdi. Mysaly, birqatar nysanda ǵımarattar men qurylystar boıynsha jobalaý qujattary joq, jeldetý júıesi qaýipsizdik tehnıkasynyń talaptaryna sáıkes kelmeıdi. Uńǵymalardy jóndeý jumystary kezinde ekologııalyq normalar saqtalmaıdy, onyń ishinde uńǵymalardy jerasty jáne kúrdeli jóndeý kezinde qorǵanysh plenkalary joq, úıindiler qoıma retinde paıdalanylady, lastanǵan topyraq ýaqtyly alynbaıdy.
D.Hasanov Jańaózen kásiporyndary qyzmetkerleriniń shaǵymdaryn tekserý máselesine jeke toqtaldy. Belgili bolǵandaı, «О́zenmunaıgazdyń» keıbir merdiger uıymdarynda zeınetaqy aýdarymyn 2-3 aıǵa keshiktirgen. Kólik qyzmetin usynatyn merdiger uıymdardyń qyzmetkerleri arnaıy kıimmen jáne tamaqpen qamtamasyz etilmeıdi, ústeme jumys ýaqyty asyp ketken jaǵdaılar tirkelgen. Árbir atalǵan fakti boıynsha tıisti sharalar qabyldanbaq.
«Jalpy, jumys jalǵasady. Bul anyqtalǵan jergilikti buzýshylyqtardyń keıbir mysaly ǵana. Jańa faktiler týraly biz jurtshylyqty habardar etip otyramyz. Anyqtalǵan buzýshylyqtardyń árbir tarmaǵy boıynsha quqyqtyq baǵa beriledi. Búkil jaýapty quqyq buzýshylyqtardyń aýyrlyǵyna baılanysty jazalanady. Tıisti qujattardy quqyq qorǵaý organdaryna tapsyramyz», dedi D.Hasanov.
Sondaı-aq Bas prokýrordyń tapsyrysy boıynsha «О́zenmunaıgaz» AQ-da tender ótkizý kezinde zańdylyqtyń saqtalýy jáne ashyqtyqtyń qamtamasyz etilýi máseleleri zerdelenbek.
