Otan qorǵaýshylarymyzdyń ómirindegi dara mereke sanalatyn aıtýly sharany tamashalaý úshin sarbazdardyń alystan at aryltyp jetken ata-ana, týǵan-týystary, sondaı-aq qala halqy Almaty qalasynyń eń kórikti oryndarynyń biri, 28 gvardııalyq-panfılovshylar saıabaǵynda bas qosty.
600-ge tarta shekarashy sarbaz saltanatty sap túzegen búgingi rásimniń kórkin shahardaǵy «Jas shekarashy» áskerı-patrıottyq klýbynyń músheleri kirgize túsken. Ústerine kıgen áskerı formalary da ózderin erekshelendirip-aq tur... Kópshiliktiń kózaıymyna aınalǵan shekarashylardyń jas dostary qoldaryna qarý alyp, Qurmetti qaraýyl rotasynyń qataryna turdy. Al bul – jas patrıottarymyzdyń rýhtaryn janı túskeni haq...
UQK Shekara qyzmeti Almaty oblysy boıynsha departamentiniń bastyǵy polkovnık Álibek Kaıýpovtyń buıryǵymen, Jaýyngerlik Tý kóterýshiler toby sap túzegen sarbazdardyń aldyn kesip ótip, óz oryndaryna turǵan soń rásim elimizdiń Memlettik Ánuranymen bastaldy. Bul – «Kóktem-2023» shaqyrylymy úshin mańyzdy sáttiń tusaýy kesilgenin bildirip tur edi.
«Men qatardaǵy jaýynger...» dep bastap, týǵan eliniń halqyna aqtyq demi qalǵansha adal qyzmet etýge ant berýshilerdiń qatary birtindep kóbeıe túsken. Osynaý mańyzdy sátti qalt jibermegen Almaty oblysy boıynsha departamentiniń basshylary, shekarashy ardagerler men mártebeli qonaqtar sarbazdardy quttyqtap, qabyldaǵan anttaryna adal bolýǵa tilek bildirdi.
Qalyń jurtshylyqtyń basyn qosqan shara departamentke qarasty Qarasaı aýdany boıynsha shekara basqarmasynyń arnaýly maqsattaǵy utqyr is-qımyldar tobynyń sahnalyq kórinisine ulasty. Munda el shebindegi kúrdeli jaýyngerlik tapsyrmalardy oryndaýǵa mashyqtanǵan áskerı qyzmetshiler shekara buzýshylardy ustaýdyń tásilderin asqan sheberlikpen kórsete bildi.
«Týǵan jerdiń shekara shebinde júrý – árkimge buıyrmaıtyn baq» demekshi, shekara – júregi «Otanym» dep soqqan naǵyz patrıottardyń mekeni. Endi mine, osynaý patrıottarymyzdyń qataryn jańadan tolyqtyrǵan jas sarbazdardyń júregin qýanyshqa toltyrǵan búgingi tamasha merekeni UQK Shekara qyzmetiniń ánuranyna aınalyp úlgergen «Biz – shekarada!» atty patrıottyq án aıaqtady.
Tamara DÁÝLETBAEVA,
UQK Shekara qyzmetiniń zapastaǵy podpolkovnıgi.
