Mınıstrdiń sózinshe, qazir Qazaqstannyń 9 óńirinde qala halqyn sýmen qamtamasyz etý kórsetkishi 100%-ǵa jetip otyr.
Vedomstvo basshysy aıtqandaı, taza sýmen qamtamasyz etýde Jambyl (91,9%) oblysyndaǵy qalalar men Qostanaı, Aqmola jáne Soltústik Qazaqstan oblystarynyń aýyldarynda baıaý dınamıka baıqalyp otyr.
Bul rette bıyl sýmen jabdyqtaý jáne sý burý júıelerin salyp, jańǵyrtý jónindegi 400-den astam jobany iske asyrýǵa respýblıkalyq bıýdjetten 280 mlrd teńge bólingenin aıta ketken oryndy. Osy arqyly jyl sońyna deıin qalalardy sýmen qamtamasyz etý kórsetkishin 98,8%-ǵa, al eldi mekenderde 96,3%-ǵa jetkizý kózdelgen.
Sonymen qatar M.Qarabaev sý tazartý júıeleriniń qaýqaryn arttyryp, magıstraldy sý qubyrlaryn keńeıtý boıynsha júrgizilip jatqan jumystarǵa toqtaldy.
«Taza sýdy tartý boıynsha kezeńdik jospar ázirlenip, soǵan sáıkes barlyq eldi meken qamtylady. Árbir qalalyq jáne aýyldy eldi mekenge baılanysty monıtorıng júrgizilip keledi. Onyń ishinde izdestirý-barlaý jumystary, jobalaý-smetalyq qujattamany ázirleý jáne qurylys-montaj jumystaryn iske asyrý máseleleri bar», dedi mınıstr.
Buǵan qosa ol sý resýrstaryn únemdeý maqsatynda sýmen jabdyqtaý, sýdy burý jáne ony tazartatyn júıelerdiń óndiris prosesterin avtomattandyrýdy usyndy. Bul arqyly sý arnalarynyń barlyq kezeńinde qajetti resýrsty esepke alýdyń keshendi jumysy júrgizilmek.
«Sýmen jabdyqtaý jáne sý burý júıesiniń gıdromodelin qurý úshin barlyq óndiris ýchaskesinde sýdyń kólemin ólsheıtin jabdyqtardy ornatý qajet. О́z kezeginde avtomattandyrý isi sý arnalarynyń aldaǵy ýaqyttaǵy shyǵyndaryn azaıtýǵa, sondaı-aq tıimdi damý modelin jolǵa qoıý arqyly sý ınfraqurylymyn salyp, jańǵyrtýǵa jumsalatyn memlekettik qarajatty únemdeýge septesedi», dedi M.Qarabaev.
