Tıimdi tásil

Qyzylorda oblysynda medısınalyq kadrlar jańa bilim berý tehnologııalaryn qoldaný arqyly daıyndalady Álemdik densaýlyq saqtaý salasynyń qazirgi negizgi problemalarynyń biri – birinshi kezekte medısınalyq kómek kórsetetin qyzmetkerlerdiń tapshylyǵymen, dárigerler men medbıkelerdiń jáne akýsherlerdiń arasalmaǵyndaǵy úlken alshaqtyqtarmen, sondaı-aq, medısınalyq qyzmetkerlerdiń úlken qalalarda shoǵyrlanyp alýymen baılanysty bolyp otyr. Elimizdegi osy problemanyń bir kórinisi – bilikti medısına qyzmetkerler sanynyń aýyldyq aýdandarda sıreı túsýi. Dárigerlerdiń bilimin jetildirýdiń Almaty memlekettik ınstıtýty el óńirlerindegi osy problemany sheshý úshin kadrlardy úzdiksiz daıarlaýdyń qanatqaqty jobasyn usyndy. «Qyzylorda oblysyndaǵy densaýlyq saqtaý júıesin uıymdastyrýdy jetildirý jónindegi ǵylymı negizdemeni jáne kadrlardy úzdiksiz kásiptik daıarlaýdyń keshendi modelin ázirleý» dep atalatyn bul jobany júzege asyrý maqsatynda ınstıtýt basshylyǵy men Qyzylorda oblysy ákimdigi arasynda yntymaqtastyq týraly memorandým jasalynyp, oblystyq densaýlyq saqtaý basqarmasymen birlesken baǵdarlama qabyldandy. Qyzylorda oblysyndaǵy densaýlyq saqtaý salasynyń jaǵdaıyna júrgizilgen taldaýlar nátıjesi bul oblysta mamandar biliktiligin kóterýge degen qajettiliktiń kúshti ekendigin kórsetti. Sondyqtan, oblystyq densaýlyq saq­taý basqarmasymen kelisile otyryp, biliktilikti arttyrý kýrstaryn, semınarlar men sheberlik synyptaryn júrgizýdiń merzimderi anyqtaldy. Qyzylorda oblysyndaǵy medısınalyq kadr­lardyń kásiptik daıarlyǵyn úzdiksiz arttyrýǵa baǵyttalǵan bul baǵdarlamanyń bir ereksheligi – onyń naq osy óńirdiń jaǵdaıy men qajettiligine laıyqtalyp jasalǵandyǵy bolyp tabylady. Sondyqtan, mundaǵy oqý baǵdarlamalarynyń barlyǵy osyndaǵy densaýlyq saqtaý júıesiniń ózindik erekshelikterin barynsha eskeretin bolady. Máselen, medısına qyzmetkerlerin bir ortalyqqa jınaýdyń kúrdeliligi eskerile otyryp, jańa oqytý tehnologııasynyń múmkin­dikteri negizinde telemedısınanyń jetistikteri paıdalanylady. Sondaı-aq, aýyldaǵy dáriger­lerge olardyń óz jumys oryndarynda oqytý isi qoldanylady. Sheberlik synyptaryn júrgizý úshin M.Lomonosov atyndaǵy Máskeý memlekettik ýnıversıtetiniń, Arhangelsk qalasyndaǵy qoǵamdyq densaýlyq saqtaýdyń halyqaralyq mektebiniń oqytýshylary, sheteldik mamandar shaqyrtyldy. Jasalynǵan kelisim boıynsha, 2014-2015 jyldar aralyǵynda 1078 medısına qyzmet­kerlerin oqytý josparlanǵan. Bıylǵy jyldyń basynan beri 514 qyzylordalyq dáriger oqýdan ótti. Sonyń ishinde, respýblıkalyq bıýdjet esebinen 2014 jyldyń basynan beri 191 maman óz biliktiligin kóterse, 26 maman qaıta daıarlyqtan ótti. Al jergilikti bıýdjet esebinen 587 maman óz biliktiligin kóterip, 86 maman qaıta daıarlaýdan ótti. Suńǵat ÁLIPBAI, «Egemen Qazaqstan».